政情：李應生撐日製乾鮑技術
日本核輻射危機影響深遠，對當地民生及經濟損害難以估計，好似深受港人喜愛嘅日本鮑魚，肯定減少供應，對本港參茸海味業界及食肆造成一定影響。香港中藥聯商會永遠會長李應生（Tommy）坦言，現時批發商已經放慢出售日本海味，普遍行家都係依靠存貨維持生意，佢仲預期今次災難對佢哋行業嘅影響，係以年計算。
對於名貴嘅日本乾鮑魚前景，Tommy估計，即使日本東部全毀，相信以日本人首屈一指嘅製乾鮑魚技術，可以搬去其他較乾淨嘅水域重振聲威，但供應肯定會減少。雖然如此，但Tommy話乾鮑魚都有其他地區來貨，包括內地青島，近年價錢已逐步貼近日本乾鮑。
鼓勵減排 節省用電
講到核電潛在危險，Tommy話大家應該努力減排，減少用核電，好似佢已計劃喺旗下店舖推行LED照明系統，以節省用電，但裝設成本要十多萬元，要長期使用才能追回成本。