政情：鬍鬚曾遺禍 建制派點收科？
建制派為咗阻撓泛民主派喺上月三十日對財政司司長鬍鬚曾提出不信任議案，早前瘋狂派出近廿人以「大包圍」方式抽籤提動議。今次攔截行動雖然成功，但後遺症亦逐漸出現，令其他真正想提動議嘅議員，可能排到六月底先至提到，當中最受影響嘅就係必須喺六月頭或之前提出嘅六四動議。呢個由鬍鬚曾搞出嚟嘅亂局最後點樣收科，要考吓建制派嘅政治智慧喇！
鬍鬚曾早前漠視民意推出「史上最廢」預算案，之後匆匆跪低派錢求和，手法又做得極為拙劣同漏洞處處，民主派派出四名議員抽籤向佢提出不信任動議。港府為咗保住鬍鬚曾，使橫手動員多達近廿名建制派議員「反冧友」抽籤，最後以多欺少真係畀佢哋抽贏咗。
動議清單 暑假前講唔晒
依家議員抽籤提動議嘅清單上，仲排多達二十六人，以一個星期辯論到兩項動議計算，抽到立法會七月放暑假前都講唔晒。再者其中十六人係來自建制派，泛民喺最唔好彩嘅情況下，可能要等到六月底先至有機會提到動議。
睇番班建制派議員初步提議嘅辯論題目，好多都係擺明用嚟霸位抽籤嘅，單係十二五規劃就同時有三人提出，開發鄉郊邊境土地亦有兩項，仲有大堆發展釣魚業、為人口老化做準備、以至推廣儒家思想等冇迫切性嘅議題，令議員難以再提出一啲有時間性嘅題目。例如泛民一年一度提出嘅六四動議，就好可能無法喺六四前提出。
雖然建制派向來唔支持六四動議，但亦冇試過故意阻撓泛民提出，相信今次只係「無心之失」。不過，如果佢哋主動讓路畀六四動議，不但在政治上不正確，亦變相等於自證當初抽籤提動議，根本係毫無迫切性，純粹係為咗保皇。如果佢哋企硬唔讓路，又會畀泛民上綱上線質疑佢哋阻撓提案，認真頭痕。
身兼支聯會常委嘅議員張文光就表明，如果最後泛民冇人抽到籤喺六四前提動議，佢哋惟有借緊急休會辯論嘅名義闖關，到時個波又會去番來自建制派嘅立法會主席度，真係批又死唔批又死。