政情：感到地震 數漏梁卓偉
日本地震造成巨大傷亡，菲律賓呂宋對開海面尋日亦發生六級有感地震，遠至本港都感覺到震動，為免市民變咗驚弓之鳥，天文台助理台長梁榮武喺尋日下午嘅日本大地震應對記者會上，急急講出最新資訊，話雖然手頭上資訊唔多，但係最少收到四個市民報告指感受到地震……其實係五個至啱，因為食物及衞生局副局長梁卓偉亦都啱啱同佢講感受到地震咁話。
爆日式餐廳大鑊
一向自信嘅梁卓偉畀人拉落水擺上台，梗係冇面露難色，原來喺地震時，佢喺尖沙咀文化中心同香港兒童管弦樂團綵排緊。佢係香港兒童管弦樂團指揮，加入政府做嘢之後從來冇放棄自己嘅興趣，一有時間，佢就「攝」咗去演出。
呢幾日，日本輻射污染食物搞到香港人心惶惶，有記者就問梁卓偉，市民幫襯日式餐廳時使唔使小心啲？梁卓偉唔知老實定有心，竟然踢爆香港好多日式餐廳嘅食材都唔係嚟自日本，人哋依家生意慘淡，局長咁講都唔知幫忙定倒米。