政情：樓價高企 社總也做房奴
家陣樓市熾熱，住宅物業同商業大廈嘅樓價都一齊升。置業難嘅問題除咗困擾一般打工仔之外，原來對工會都有影響。社會工作者總工會尋日為新總部舉行開幕儀式，會長兼社福界立法會議員張國柱話，新總部去年六月成交，當時商業大廈樓價仲未炒起，諗番起都覺得好彩喎。
社總新總部建築面積一千三百呎，聽落好似唔係好大，不過原來已經比舊總部大咗差唔多一倍喇。張國柱話，要搞獨立工會運動，有自己資產最緊要，所以點都要有個總部揸揸手咁話；新總部成交價三百三十萬元，即使賣咗舊總部，仍舊欠幾十萬，為咗籌錢，佢哋向會員發行債券，東拼西湊終於夠錢搬新屋。
唔經唔覺，社總成立已經三十年，當年一班社工好辛苦籌到三十五萬買咗個七百幾呎嘅單位做總部，張國柱話，依家雖然有新總部用，不過之後幾年仍然要不斷籌錢還債。佢就話希望咁多會員踴躍捐輸，希望大家將政府額外派或者退稅嗰六千蚊拎出嚟畀工會喎。