中環出更：李鋈麟冒寒帶隊訪京

蒸餾水凍到變冰條

北京凍到零下負十度，李鋈麟隨手攞起旅遊巴上一支水嚟飲，點知經過一晚，蒸餾水凍到變冰條。

李鋈麟以團長身份帶隊，吸引共五十人參加，除咗前衞生署署長李紹鴻，仲有電視藝人姚嘉妮嘅輔警爸爸姚仰龍。李鋈麟去北京唔係首次，但遇上天寒地凍季節，都咪話唔辛苦。

北京寒風刺骨，的確令人吃不消，李鋈麟帶定厚皮草抗寒，總算冇冷親。擔任副團長嘅李鋈麟弟弟李鋈發就相當體貼，抵達北京當晚，帶眾人去火鍋店食消夜，一口氣叫廿幾碟餸，包括涮羊肉、冬蟲草燉雞等，有米落肚，凍到震嘅團友們即時醒神晒。

此行仲有另一特色，就係大隊有晚入住位於平谷區嘅四合院，呢度係一間大型國企公司嘅培訓中心，平時不招待外賓，團友感覺新鮮好奇。

卓妮