政情：郭炳江現身攝影展拒談「分家」

捧老友簡永楨場

熱愛神秘瑪雅文化嘅新地副主席兼董事總經理郭炳江，尋日現身中環ifc，為香港歷史博物館諮詢委員會委員及旅行家簡永楨嘅「瑪雅謎團攝影展」撐場。原來郭炳江同簡永楨兩人相識十幾年，郭生見老友早前遊墨西哥東南部嘅猶加敦半島，拍下唔少珍貴相片，一於公諸同好。尋日共展出四十幅作品，有興趣嘅朋友，可以去ifc欣賞吓瑪雅遺址今日嘅面貌。

齋聽猶加敦半島呢個名已充滿神秘感，郭生都流露嚮往神情，話好有興趣遊歷吓。但望梅始終難止渴，大會尋日以墨西哥薄餅招呼嘉賓，又奉上墨西哥龍舌蘭酒，畀台上貴賓敬酒。不過呢隻酒屬烈酒級數，郭生淺嘗一啖，登時雙眼一亮，露出一副醒神晒嘅表情，唔敢再飲第二啖。

飲咗酒，唔代表郭生嘅防線會降低，記者問佢點睇大哥郭炳湘聲稱與家族和解在望，郭炳江相當清醒，一於封口唔講。