政情：政經名人齊變王梓軒Fans
港區人大代表王英偉公職多到爆燈，不過無論幾忙都好，撐囝囝王梓軒永遠係佢心目中最重要嘅事。王梓軒尋晚開始一連兩日同香港中樂團喺尖沙咀文化中心合辦「中西新歷聲」音樂會，星爸兼唱片公司老闆王英偉親自到場打氣，仲叫埋政商界老友入場欣賞，呢位老爸真係唔話得！
好多後生粉絲入場撐偶像，政界人士亦都畀足面現身，好似財經事務及庫務局局長陳家強、運輸及房屋局局長鄭汝樺、「經濟動力」立法會議員林健鋒、信興集團副主席蒙德揚等，個個變身王梓軒嘅忘年歌迷，難怪全場爆滿啦。王家大少啱啱橫掃樂壇五個年終大獎，實力同努力有目共睹，難怪Uncle、Auntie們咁錫佢啦。
王英偉就話，囝囝首次同香港中樂團嘅八十位樂手合作開演唱會，樂團改編王梓軒原創嘅歌曲，然後以中樂合奏。同場仲有城市當代舞蹈團伴舞，加理青協旗下嘅無伴奏人聲樂團「青協香港旋律（Melody Makers）」表演，難怪咁多名人撐場。