中環出更：朱玲玲新裝源源不絕

朱玲玲衣着品味多次獲得好評，「源」出品嘅服裝，幫佢加咗不少分數。每次出席重要場合，佢指定搵「源」做衫，彼此合作無間。星期三下午三點幾，卓妮撞見素顏朱玲玲現身中環置地廣場嘅「源」。

天氣雖然寒冷，朱玲玲着上粉紅色樽領衫加埋灰色外套，拎埋Prada新款灰色Tote Bag，依然星味十足。店員見到有VIP駕到，立即熱情招呼，更加派來一位裁縫為佢度身訂造，認真照顧周到。

朱玲玲試穿多套新衫，喺更衣室內氹氹轉，逛足一粒鐘都唔捨得走。卓妮見佢露出滿意笑容，唔使問都知搵到心水喇。據卓妮了解，「源」除咗現貨時裝，亦提供度身訂造服務。如果按照客人來款做衫，收費要視乎用料及手工，價錢由萬多元至十多萬元不等；簡單一點按照現有款式重新造一件，就是原價加收百分之五十嘅費用。

行入「源」舖頭，朱玲玲直入更衣室，熟晒地頭。 （陳嘉順攝）	同店員分享扮靚經，朱玲玲愈講愈興奮。	試咗一個鐘頭衫，朱玲玲（左）滿足地離開，仲馬上戴番副黑超。

無時間同三個仔食飯

話說朱玲玲搵到心水後，心足笑住離開，見卓妮上前say hi，大方企定定影相。佢話聖誕留港休息，可惜三個仔各有各忙，無時間聚餐。

離婚多時嘅朱玲玲，甚少再提起前夫霍震霆。不過卓妮留意到一個小秘密，原來朱玲玲同前夫口味一致，對於Prada情有獨鍾，手上拎住新出半年、大約一萬九千元嘅Prada牛皮Tote Bag，就係最佳例證。

卓妮