王中之黃 廿年回望 車神是怎樣煉成的？

「過終點後梗係想搵窿捐啦，嗰次最深刻唔係輸獎，而係唔知點解自己年少氣盛，咁衝動講呢句說話。」

近廿年前，新娘潭一場計時賽，初出茅廬的黃金寶越過對手後懶型說：「走先喇！」結果被對手反先。原來這是「阿寶」職業生涯最難忘時刻，重提瘀事，他笑中帶點尷尬：「過終點後梗係想搵窿捐啦，嗰次最深刻唔係輸獎，而係唔知點解自己年少氣盛，咁衝動講呢句說話。」

沉重打擊反而鋪出其封神之路：「原來單車係修煉同鍛煉自己嘅好工具，呢個時候真正愛上單車運動嘅內涵，感受好深。」踩單車都有內涵？好神。

沉醉在單車世界，「阿寶」踩到出神入化，對其他事物興趣不大，沒有facebook，更無微博：「或者做完運動員，對追求精神較為強烈，對周邊事情唔係太在乎，睇番自己性格，呢個都係好事，但喺香港可能會有啲怪。」

放大圖片	放大圖片	放大圖片

「其實落雨落冰都冇特別，對我嚟講心情最緊要，最惡劣環境其實係運動員心裏有想法，或者想屋企、想香港或想朋友，甚至喺重複訓練中迷失咗，呢啲先係最恐怖。」

沈金康曾透露，香港單車隊員一日不踩車會腳痕，馬上於現場查證，阿寶淡然回應：「其實落雨落冰都冇特別，對我嚟講心情最緊要，最惡劣環境其實係運動員心裏有想法，或者想屋企、想香港或想朋友，甚至喺重複訓練中迷失咗，呢啲先係最恐怖。」阿寶一年平均踩四至五萬公里，即圍繞地球一圈，計一計他繞着地球踩了近廿次。

「阿寶」談起單車事雙眼總會發光，到底除單車外，能否即時講出另一嗜好呢？他認真沉思一會，答案還是一如所料：「冇喎，諗住話踩街車，但你又話單車唔得。」

「阿寶」偶爾會聽歌，鍾意聽咩歌呢？「有時都會聽歌或音樂，主要都係聽慢歌，最緊要旋律同節奏好，有時仲會聽同一首聽到厭先轉。」最欣賞邊位歌星啊？「冇乜特別留意歌星喎，間中都會睇歌詞，覺得啲人寫嘢好犀利。」最後，始終講唔出一首歌名。

放大圖片

放大圖片

「近幾年真正鍾意飲咖啡，之前去歐洲比賽更多機會，出外比賽激烈，有時都想靜吓，飲咖啡地方環境好，可以調整心情。」

車隊訓練時間超長，入戲院睇戲太奢侈，「阿寶」多於房間睇碟，約兩個月睇一套戲，上次嗰套叫《越光寶盒》，嘩，好爛喎！「唔係吖幾好笑喎，對於我哋呢啲簡簡單單嘅人OK架喇！」他鼓勵人看電影，理由是：「起碼有個幾鐘頭集中，就算好爛都可以專注睇佢有幾爛嘛！」

聞說「阿寶」最近愛上歎咖啡，採訪團隊其餘人只喝普通咖啡，他喝下兩杯炭燒的。「近幾年真正鍾意飲咖啡，之前去歐洲比賽更多機會，出外比賽激烈，有時都想靜吓，飲咖啡地方環境好，可以調整心情。」

咖啡與單車，令人上癮，同樣苦盡甘來，對吧？「其實都幾似，鍾意一樣嘢就會愈來愈投入，想做得更好，依家我繼續Keep住踩，每次都有新體驗。」

「冇乜犧牲，賺晒至真！」

「阿寶」與師弟郭灝霆愛踩車，也愛咖啡，有何金句勉勵一眾後輩？「其實踩單車好簡單，只要熱愛呢個運動，唔需要諗好多，但唔鍾意就要停，要喺自己項目度搵興趣，其實做咩工作都係一樣，搵到樂趣可以堅持好耐，有成就係完美結果，就算冇，過程都有好多得着。」

過去廿年，「阿寶」幾乎為單車放棄一切，回想多年車手生涯，種種犧牲值得嗎？「諗番轉頭冇乜犧牲，賺晒至真！」

講將來 做到施丹就好嘞

二○一○年再奪亞運冠軍，「阿寶」畀幾多分自己呢？「八分啦，亞運會成績有驚喜，但今年其他賽事有啲閃失。」

下個目標呢？「之前同沈教練傾過，單車隊最缺奧運獎牌，個牌可能要好多代人先拎到，呢個係我依家最大願望，不論二○一二年踩唔踩，都想幫香港車手圓夢。」

「阿寶」代表香港，亦代表亞洲，談及○八年於日本獲亞洲單車聯會頒獎時特別激動：「○七年贏世界賽，跟住獲亞洲單車聯會表揚，好似帶領亞洲運動員作出突破，真係好開心。」

若能代表亞洲衝擊奧運獎牌，必屬「阿寶」車手生涯中另一神迹。「如果冇前人做呢樣嘢，個個都話冇可能，以前拎亞洲冠軍都難，依家逐一突破，有信心衝擊更大目標。」

一針見血︰港體壇欠接軌

香港運動員結束職業生涯後，少數可轉做與體育相關工作，他亦關注運動員前途問題：「歐洲運動員收山後，可能做個顧問，好似施丹喺皇馬，之後就退休，但香港卻欠缺接軌。」

眼見很多運動員「夭折」或「不得善終」，甚至於三十歲前後的黃金期離場，他更想親身走完一圈：「有人因工作走，有因家人唔鍾意離開，我想行完整個圈，做個宣傳活動嘅人，畀人睇香港運動發展。」

言下之意，阿寶有心執起教鞭？「依家會諗呢啲問題，但唔會諗得太深入。如果有人畀機會，希望可以有試用期，若然要求好高，就會好大壓力，唔係唔想接受挑戰，但從事某樣工作都要畀機會學習，如果做教練更需較長時間。」

談老沈 師徒之交遠亦近

談「金寶」與「金康」關係，少不免搬出「你教一日，我踩一日」這經典對白，承諾一守十六年，漸成師徒「另類競爭」，隨着沈金康教練去年於全運會表明希望黃金寶下屆做觀眾，「阿寶」以勝利者姿態說：「係佢動搖先o架！」

「以前成日有人講，『阿寶』向『老沈』承諾過，只要你教一日，佢踩一日，其實一直都係咁，我到依家都冇話退先。」「阿寶」說。

豪言過後，「阿寶」承認曾有掙扎，最終仍堅持繼續。對於沈教練去年全運會後「縮沙」，他說：「教練睇到一個運動員去到晚期，要考慮體能問題，依家承諾兌現咗，所以好放鬆。」說到感動點，他自稱冇喊。

冇佢就冇我 功勳歸師傅

「阿寶」自言從未想過有今日成就，多得「老沈」逐點填上：「主要都係機緣巧合，自己鍾意單車，一路上有成績，其實都係『老沈』填上去，佢想我做咩運動員，或者乜性格，我都好願意接受。」

「阿寶」單車生涯低潮是由公路賽轉記分賽，全靠教練協助捱過：「轉去新項目從頭嚟過成日輸，多得沈教練引導，三年後開始訂目標，終於喺世界賽勝出。」

本想與恩師衝擊奧運，無奈時不我與，記分賽又取消，2012衝牌有難度。「限於年紀問題，再挑戰奧運（獎牌）好難，如果我有多十年體能同機能，一定會繼續。」

再談與「老沈」關係，仍是師徒，不是父子，「阿寶」說：「都係教練同運動員，老沈習慣唔想太Close，咁耐以來真正坐低傾我嘅將來加埋冇十次。」其實兩師徒一直互信互敬。

「阿寶」亦視恩師為學習對象：「有時諗事情，會諗如果係『老沈』會點處理呢，佢人生經驗豐富，思維長遠而正面，係我嘅學習榜樣。」

當年

今日

後記：兩個神

訪問黃金寶原是遙不可及，與神對話過後，發現「阿寶」毫無架子，是「體壇發哥」，是平民巨星。說「阿寶」是神，其實沈教練更像他的神，「主宰」這位巨星的單車路與人生路。

今日「阿寶」渾身散發正能量，臨別前還叮囑小記，另一願望是推廣全民運動，鼓勵市民齊齊動起來。看到他落落大方，處處顧全大局，誰還想當三姑六婆闖進他那情感的禁區？

尋「寶」記

出生日期：73年3月13日

成長地方：沙田

星座：雙魚座

最愛食物：湯麵

最愛飲品：咖啡、果汁

減壓方法：聽音樂（抒情歌）

個人榮譽：香港十大傑出青年、銅紫荊勳章得主

威水史：07年場地捕捉賽世界冠軍

98、06及10年亞運會公路賽金牌

97、01及09年全運會公路賽金牌

圖、文：溫振強、李芷韻、Maggie Wong、Carrie