中環出更：阿Ron選袖口鈕簡約夠品味
西裝稱得上係男士嘅戰衣，可惜款式變化不大，惟有喺配飾上搞花臣，凸顯個人魅力。卓妮知道好多名人有搜購特色恤衫袖口鈕嘅習慣，咁啱上星期六喺中環太子大廈行商場，就遇到行政會議成員夏佳理（Ron）喺「Links of London」店舖內買嘢，原來阿Ron喺度買咗一對價值千五元嘅純銀衫鈕型袖口鈕。
上周六下晝五點鐘，平日繁忙嘅中環人流疏落，點知就畀卓妮喺太子大廈商場間Links遇到阿Ron，見到佢嗰陣，阿Ron已經企喺收銀櫃枱畀緊錢，櫃面放有一件白恤衫，恤衫上面有個精緻小錦盒。畀完錢，阿Ron環保到連紙袋都唔攞，一手攞起恤衫同錦盒就離開。見佢戴起太陽眼鏡，沿着太子大廈行人天橋行過對面酒店門外，登上自己部凌志七人座駕離開。
盛惠千五元
早幾日卓妮在香港會又遇到阿Ron，問佢喺Links買咗乜啦，原來係買袖口鈕。雖然Links嘅袖口鈕好多款式，由一千五百元嘅純銀到一萬五千元嘅18K黃金袖口鈕都有，但卓妮就打聽到，當日阿Ron買嘅袖口鈕係純銀Classic Button T-bar款式，即係最簡約衫鈕型嗰款，盛惠千五元，據聞尋日最後一對已經賣埋嘞！
Links of London創立於一九九○年，最初只為餐廳製造魚形袖口鈕作禮物，但設計吸引咗倫敦著名百貨公司Harvey Nichols訂購，Links牌子因此而誕生，至今生意遍布英國及美加等地。
Links嘅產品設計與功能兼備，糅合咗現代與經典、潮流及意想不到嘅產品，就以18K黃金打造嘅袖口鈕為例，極重分量及質感，展現男士沉穩及自信嘅一面。
卓妮