特許公認會計師公會（ACCA）香港分會前晚搞咗個酒會，慶祝成立六十周年。芸芸出席嘅會計師當中，我哋竟然發現本身唔係會計師嘅審計署署長鄧國斌都有現身，究竟佢嚟捧邊個場呢？原來審計署九成同事都係會計師，所以作為統帥嘅鄧國斌就話，點都要畀面嚟支持吓佢哋喎。
審計署啱啱出咗份新報告，勁插中樂團同科學園等機構財政混亂、浪費公帑。問到鄧國斌怕唔怕得罪晒啲機構團體，佢就話大家都係做嘢，冇話驚唔驚喎，仲將審計署比喻為醫生，專幫啲公司部門照肺；如果睇到佢哋有問題，就畀啲建議佢哋改善咁話，絕對唔係外界講到咁「得人驚」。
五區補選就快殺到，唔少高官及建制派議員都紛紛搵藉口離港，費事畀人話佢哋支持所謂嘅「五區公投」。鄧國斌就答得大方，話唔排除會去投票，仲好幽默咁話，審計署一向都係睇證據，所以佢會喺收到選舉事務處寄嚟嘅候選人名單同政綱後，先決定投唔投票喎，果然秉承審計署嘅專業精神！
| 人人做記者 爆料方法 : | 爆料熱線： | (852) 3600 3600 | 電 郵： | news@opg.com.hk | 網上爆料 |
| 傳 真： | (852) 3600 8800 | 手機網站： | m.on.cc | ||
| SMS： | (852) 6500 6500 | MMS： | ireport@on.cc |
