政情：鄭泳舜想做主席 爭取降低劏房加租上限

Vincent話跟進咗劏房問題10幾年，直言有興趣成為草案委員會嘅主席，繼續幫助基層市民，但係唔係佢做主席，就點都要同其他黨派以及同事商討嘅。佢又話其實邊個做主席都唔緊要啦，因為好多同事都對劏房議題非常熟悉嘅，到時可以一齊討論。

有信心完成審議

咁若果真係當選主席呢？Vincent話時間性非常重要，因為今屆立法會將於今年10月結束，時間非常緊迫，所以需要把握時間完成審議。不過，佢話現時議會的氛圍已經理順，會議過程順暢所以都有信心可以完成審議咁話喎。

佢話已經睇過一次條文，認為當中有不少地方需要小心留意，例如當中對劏房戶嘅定義，以及將如何界定業主嘅權益。佢又話雖然一直以嚟都做咗唔少諮詢工作，但希望未來仍然可以聽多啲民間嘅意見，例如來自社會、業主同劏房戶嘅聲音。

政府委任嘅劏房租務管制研究工作小組早前提交報告，建議制定載有強制性條款的「標準租約」，每兩年續租的租金加幅則以15%「封頂」。Vincent覺得15%續約加租上限太高，因為市民收入亦未有15%嘅增幅，認為應該以10%作為封頂囉！佢建議當局用一年時間調查，再設立起始租金。佢又希望政府主動回應，否則審議條例嘅時候，唔排除會提出修正案喎。