魔術率先闖次圈

基於山貓整體實力不及魔術，所以今個系列賽明顯帶有距離，再加上「Captain Jack」史堤芬積遜尋日大失水準，11次起手僅入2球，全場只得8分，連主要得分點都啞火，山貓想翻身都難。結果魔術全場控制戰局下，以99比90輕取對手，連勝四場出線。

「魔獸」犯規多隊友補飛

杜域侯活今場再受犯規次數困擾，整場賽事只係上陣23分鐘僅入6分，並在第四節六犯離場；幸好其餘隊友都交到貨，卡特攻入21分、尼爾遜18分，而劉易斯亦有17分進帳，均分擔了杜域侯活嘅得分責任，但「魔獸」必須要正視犯規問題，因為首圈季後賽中，杜域侯活每場至少五次犯規，更有三場賽事上陣時間不足三十分鐘，大大影響球隊部署。

公鹿擒鷹追成二比二

魔術出線後，將獲得較多休息時間，靜候鷹隊與公鹿決出勝負，尋日公鹿藉主場之利，憑真寧斯攻入23分、迪芬奴及沙蒙斯分別射入22分，協助球隊以111比104擊敗鷹隊，總成績追成2比2。真寧斯賽後話球隊贏在冇壓力在身，因為大部分人都睇死佢哋會首圈出局，球員反而可以放開懷抱比賽。

本報綜合報道