匯賢智庫理事會主席兼立法會議員葉劉淑儀，尋晚以一身Armani套裝出席匯賢智庫三周年嘅籌款晚宴，順道幫海洋公園主席盛智文慶祝生日。葉太自爆為咗個晚宴，佢已經兩手準備，預備定另一套Armani，若果真係出現女士們最忌嘅撞衫場面，就可以即時更換喎。
雖然尋晚高掛三號風球，場面都好熱鬧，連久違了嘅前環境運輸及工務局局長廖秀冬都現身捧場。葉太介紹嘉賓嘅時候就好誇張咁話，見到大家一雙一對赴會，真係連空氣中都有瀰漫愛情喎，原來立法會主席同埋涂謹申都帶埋女友出席，場面都好溫馨。
跟住葉太拉埋壽星仔盛智文上台切蛋糕，不過年齡就唔講啦，只係話盛智文今年廿六歲喎！尋晚幫手做司儀嘅葉太囡囡葉榮欣（Cynthia）隨即送上一盒寫上「The Bad Boy's birthday（壞孩子的生日）」嘅生日禮物畀盛智文，裏面有一個用嚟控制女士嘅玩具遙控、電影《危險人物》同埋立體記事簿。Cynthia話呢啲咁鬼馬嘅禮物係佢喺美國專登揀畀盛智文，唔怪得之盛智文笑得咁開心啦！