前立法會議員譚香文（Mandy）早前事先張揚會在新書中爆大鑊，重提○五年政改方案表決前夕，有位泛民專業人士與特首代表見面時，表明會支持政改方案，但後來畀盟友鬧到反艇先至轉軚。Mandy本新書尋日終於出爐，大家熱切期待睇吓Mandy點樣大義滅「親」啦，點知發現有關內容竟然塗黑咗，真係眼前一黑，好黑暗啊！
咁有爆炸性嘅內幕之所以塗黑咗，Mandy慨嘆實在有口難言。乜泛民唔係捍衞言論自由嘅咩？Mandy就解釋，為免有人對號入座有所行動，亦想新書成功出版，惟有塗黑有關內容，但她講明唔係自己驚青，只係書商驚啫！雖然無咗段政改秘聞，但Mandy以全新形象主持新書發布會，亦好有睇頭，可惜大部分賓客都係佢嘅同學或舊街坊，唔見有政界中人。
Mandy在新書中提到去年選舉落敗後，只有兩名舊黨友加以問候，其他人影都無埋，認真係人情冷暖，點滴在心頭。