英姐早前喺立法會大樓內嘅樓梯跌傷，醫藥費累積至今估計已經超過二十萬元，但由於議員喺法律上唔算係僱員，唔受立法會為秘書處職員購買嘅勞工保險保障，最多只可以申領每年二萬幾蚊嘅議員實報實銷醫療津貼。議員黃定光早前就去信立法會行政管理委員會為英姐抱不平，要求檢討有關嘅法律責任問題同搵辦法堵塞漏洞，以及為英姐追番有關嘅醫藥費差額。

正式索償 隨時賠突

據聞政府同立法會經過幾次信來信往之後，初步認為英姐雖然自己差錯腳跌親，但亦唔代表佢哋完全冇責任，皆因出事嘅樓梯扶手係八十年代嘅產物，而且只有一邊設有扶手，唔符合現行建築物條例嘅安全要求，現場亦冇任何告示牌提醒使用者緊握扶手或者小心上落，若果英姐正式告上法庭要求索償，亦有一定勝訴機會，到時分分鐘唔止要賠廿萬，不如主動幫佢支付醫藥費當作和解算數。

但係呢筆費用到底應該由政府定係立法會畀，至今都未有定案。立法會方面認為政府係立法會大樓嘅業權擁有人，有乜改建工程都係由建築署負責，唔應該由作為租客嘅立法會畀錢。不過政府就質疑立法會唔係純粹租客咁簡單，而係大樓嘅實質管理人，況且立法會依家仲水浸，有一億四千萬元儲備，冇理由依家出咗事就要政府孭晒，睇嚟雙方仲會有排拗。

有議員就指出，無論呢條數最後係由政府定係立法會出，其實都係公帑，最重要係幫英姐追番部分醫藥費，毋須深究誰是誰非。如果雙方因為咁小事又要嘥錢打官司嘅話，就真係因小失大，搵納稅人嚟搞。