前民政事務局局長何志平自前年辭官後，一直鑽研文化，期間出版過《文化政策與香港傳承》，仲有本論盡香港宗教掌故嘅《天上人間》，又計劃在年底推出新書，介紹中國傳統文化，包括中國曆法、二十四氣節、天干和地支、四大菩薩（觀音、文殊、普賢及地藏）等。
本周二浸大當代中國研究所開幕，肥平都有畀面撐場。肥平話，為咗本新書，早排曾走遍中國各省市搜刮資料，內容相當豐富。
肥平本身係基督教徒，問佢研究涉及佛教，覺唔覺得有衝突？佢就話研究與宗教信仰無關，只想大家深入了解中國傳統文化。
講開歐美豬流感疫情爆發，經常到外地探朋友嘅肥平都話唔敢外遊住，仲預期豬流感一定會傳到來香港，難逃一劫。不過，肥平指港人經過○三年沙士之後，相信已有所準備，亦有足夠能力應付豬流感爆發，目前嘅情況只不過係驚弓之鳥啫！
肥平仲話，萬一豬流感真係不幸爆發，只要當局有效隔離病患者，相信一個月就可以解決。如果一個月都唔得又點呢？肥平話：「殺到嚟咪走入深山避吓囉！」唔通肥平走訪中國大江南北時，已經物色到理想深山居所？