入型入「格」

不只服裝款式有季節之分，圖案亦然，好似格仔便是秋冬季最具代表性的圖案之一，特別是今季更廣受潮流品牌追捧。格仔服飾人人都有，點襯先夠潮？睇睇各地街頭型人示範，就可以齊齊着得入型入「格」。

格仔Look可說是代表性的Rock Chic打扮之一，想襯出Rock味最好從下身「打格」開始，穿格仔長褲或短裙，上身襯皮褸或西裝褸，再腳踏短靴或高踭鞋，就可以輕鬆襯出型格搖滾造型。

潮流興玩Print撞Print，格仔都不例外，今季Dior及Chanel等名牌Fashion Show都以格撞格的配搭作主打。想去到盡可以全身都以同一格仔由頭襯到落腳，不過建議最好用不同大小格仔襯格仔，或是格仔襯千鳥格及其他圖案如間條等，以凸顯豐富層次感和視覺效果。

下身「打格」可以輕鬆襯出型格Rock Chic造型。	全身格撞格，絕對夠搶眼！	將格仔恤衫綁在腰間，造型更顯個性。
Giada Benincasa紅×白×綠色格仔大褸 $11,946（D）	Maje啡色格仔西裝褸 $4,145（B）	Sandro黑白色格仔針織外套 $2,945（A）