大埔Aqua Park 6米滑水梯極速解暑
夏日除咗為大地帶來美腿，仲有各式刺激的水上活動，不過年年都船P衝浪加潛水，你唔悶我都悶啦！位於大埔白鷺湖的CORE Aqua Park，就啱晒貪新鮮又愛刺激的你，事關呢個水上樂園設有超過20個大型障礙物，一個費用就可入場任玩，考你膽識、體力同平衡，務求使大家「噗咚」一聲跌落水，濕身一解暑氣。
逾20個水上障礙物
美國障礙賽真人Show《橫「沖」直撞》喺全球勁受歡迎，連韓國人氣節目《Running Man》都曾經模仿，今次在大埔白鷺湖互動中心設置的CORE Aqua Park，刺激程度不遑多讓。這個設於湖中的水上充氣樂園，面積達15,000平方呎，提供超過20個大型障礙物，比上年只有12個充氣設施好玩得多，當中包括升級版6米充氣滑梯、水上對戰的香蕉船、考反應講體力的抱抱單柱等。入場參加者沒有年齡限制，只要身高一米並穿上救生衣就玩得。而且場內有救生員當值，以確保安全。
6米高巨型滑梯
水上樂園又點可以無滑水梯！呢條巨型滑梯足足有6米咁高，從另一邊繩網爬上頂後，即可從高處瀡下。由於斜度近乎垂直，加上濕水後勁滑，所以玩時極具離心力，真係要有咁上下大膽先至敢玩，但不用3秒就滑落水，呢個快感幾驚都值得。
濕身指數：★★★★★（以5★為最高）
擺動馬卡龍
由多個小型浮床組成，因外形酷似馬卡龍而得名。咪睇佢咁得意，玩時極考平衡力，就算站立都有點難度。唔想跌落水，蹲下慢慢爬就最穩陣。
濕身指數：★★★
瘋狂跑步機
顧名思義係要參加者化身人肉倉鼠，在水上滾輪內瘋狂向前跑。遊戲需要大量體力，稍一踏空或腳軟就會跌倒，但落水機會不大，唔怕轉到頭暈不妨挑戰。
濕身指數：★★
水上香蕉船
團隊合作遊戲，香蕉船兩邊各坐1至2人，大家起勢搖務求「揈」對方落水。遊戲精彩在壯男爬上船都要花盡力氣才能保持平衡，既講求合作又考體力。
濕身指數：★★★
抱抱單柱
由多條吹氣單柱組成，參加者要由一邊爬到另一邊。看似簡單，但由於借力位極少，而且濕水後都幾滑，唔想變「落湯雞」就最好以手代足爬過去。
濕身指數：★★★★
彩虹隧道
專為小朋友而設，捐過隧道就可到達另一邊，算是場內最輕鬆項目。大人也可入內稍作休息，待回氣後再挑戰高難度關卡。
濕身指數：★
CORE Aqua Park活動詳情
地址：香港大埔白鷺湖互動中心—大埔紅林路2號
開放時間：星期一至五9:30am~6:00pm、星期六、日及公眾假期10:00am~6:00pm（每小時為一節，包括10分鐘安全講解）
票價：$158（網上預訂）、$178（即場購票）
人數限制：每節150人
網址：http://bookeo.com/corehk
同場加映：美味小食 補充體力
玩完水上活動，梗係要吃點東西補充體力，場內提供不少特色美食，當中必試魷魚薯條及芝士肉醬熱狗，前者將魷魚炸至金黃色，入口外脆內軟；後者則在熱狗的肉醬表面鋪上三層芝士，味道層次豐富。
撰文：陳志滔
攝影：蔡浩文
模特兒：Eriko Yeung（Reborn Production）
查詢電話：2465 3468