我長那麼高，活那麼老，最近才第一次坐商務客位。
當然不是我付錢啦黐線（口架）你，有人邀請我去韓國工作，我也沒有要求，他們就自動買了張商務機票給我，唔使錢，咪試吓囉。唔試尤自可，一試我才驚覺，乜原來我個膝頭有權唔頂櫈，而且對腳係有資格自由伸長（口架）……？
我大鄉里出城，梗係乜都試吓啦。除咗對腳好自由之外，原來有排掣畀你自由控制張櫈，而且係逐Part控制，又上又下又左又右又前又後咁郁吓郁吓，我玩咗5分鐘，愛不釋手。
另外，坐得商務，原來雜誌都多幾本呀，唔睇都揭吓囉咩事呀，不過啲雜誌喺正前方屏幕側邊，當中的空間實在太闊、太遠，我差啲就拎唔到。
係，一定係我錯覺，我覺得商務機艙啲空姐Nice好多……
到食嘢喇喂，再唔係Beef Or Fish，而係有四五款畀我揀，又頭盤又湯又主菜又沙律又生果又雪糕又盛咁。
我都無謂講咁多，免得我大鄉里個Image太過出。我只係想講，我眼前呢個咁優美嘅畫面，都只不過係商務客位，真不敢想像頭等機艙是何等光景。
個世界唔公平我知，但我唔知原來唔公平到咁嘅地步。Come On James，你唔怪得啲官員同議員咁貪錢，都唔怪得李先生長期穩佔我最喜愛老竇榜第一位，有錢的話，相信冇人會再嫌飛機餐難食，再冇人會有飛行恐懼症。
網址：www.facebook.com/linrixi