西班牙直擊！Lumia 640中階孖寶攝力提升

手機界年度盛事MWC（Mobile World Congress），每年都吸引各大廠商推出新作，Microsoft亦不甘後人，喺展覽開幕日發布中階手機Lumia 640及640 XL。雖然新機嘅定價最平由139歐元起，但配備大芒之餘，又保證升級到Windows 10作業系統，最重要係拍攝質素提升，640 XL仲玩埋蔡司鏡頭，原來中階機款一樣咁吸引！

年輕用色

Microsoft今年與各大手機品牌雲集Hall 3展館，為了突圍而出，特意將展區打造成迷你城市，草地、熱氣球等遠遠已經望到。發布會仲要揀喺展覽開幕日嘅上午7時30分舉行，搶吃頭啖湯，現場由Microsoft Devices Group執行副總裁Stephen Elop主持，示範Lumia 640及640 XL新功能。其實新機屬Lumia 635的後繼型號，繼承以往嘅年輕風格，底殼用上聚碳酸酯物料，備有橙、白、藍、黑4色選擇，最大分別係Lumia 640用上拋光面，而Lumia 640 XL則換上磨沙面，不過前者幾易沾上指模，後者就含蓄少少但易於打理。

高質拍攝

Lumia 640及640 XL另一分別係尺寸，前者備有5吋屏幕，後者則搭載5.7吋芒，同樣用上Clear Black及IPS技術，不過解像度只得720p，顯示未算細緻。硬件方面，兩機均用上1.2GHz四核心處理器及1GB RAM，實際操作都算流暢。鏡頭亦係重點之一，Lumia 640選用800萬像素鏡頭，Lumia 640 XL配備1,300萬像素蔡司認證鏡頭。小記現場試拍時，兩機嘅對焦、測光速度都唔錯，成像比一般中階手機出色，當中640 XL嘅成像更紮實銳利，追求靚相嘅用家大可考慮。最實用是預載《Lumia Camera》App，內置Rich Capture功能讓用家自選多款HDR效果。

Lumia 640 XL（左）與Lumia 640（右）整體設計相近，留意前者圖示較大，睇得更舒服。<br>Lumia 640 XL售價：189歐元（3G）、219歐元（4G）<br>Lumia 640售價：139歐元（3G）、159歐元（4G）

Lumia 640 XL（左）與Lumia 640（右）整體設計相近，留意前者圖示較大，睇得更舒服。
Lumia 640 XL售價：189歐元（3G）、219歐元（4G）
Lumia 640售價：139歐元（3G）、159歐元（4G）

Lumia 640 XL多款配色中，以橙、藍兩色最搶眼。

兩機均可升級至Windows 10，到時肯定大把新嘢玩。

附送軟件

雖然現場嘅新機只預載Windows Phone 8.1系統，但已更新Lumia Denim，下拉式Action Center、Cortana語音助手等功能都玩得到，廠商仲保證今年內可升級至期待已久嘅Windows 10，吸引力大增！暫時冇得玩新系統難免叫人失望，幸好廠方推出了一系列優惠，如買機即附送《Office 365》一年個人版，讓手機、電腦齊齊用，另有1TB OneDrive雲端儲存空間及每月60分鐘Skype全球通話分鐘。近年Lumia手機興玩雙卡雙待功能，兩款新機當然唔少得，仲推出雙卡雙待4G版，Lumia 640 XL預計於3月全球開售，Lumia 640就遲少少喺4月推出。

預載工具如《Lumia Camera》、《Lumia Creative Studio》等都與拍攝後製有關。	透過《Lumia Camera》可拍攝Rich Capture相片，能調校不同HDR風格。	Lumia 640（左）採用一般鏡頭，而640 XL（右）則用上蔡司鏡頭。
Windows 10介面率先睇採用格仔介面，但圖示改為半透明式，能顯示相關內容。	將短訊及Skype整合，可隨時切換不同聯絡方式。	瀏覽器設計和排位更接近桌面版，介面簡潔。