Xperia M入門有螢

暑假就快放完，學生哥辛辛苦苦做暑期工，冇理由唔買嘢獎勵吓自己，但係今時今日一部Smartphone隨時要三四千元，試問點買得落手？Sony Mobile似乎明白大家需要，在推出旗艦機Xperia Z Ultra之餘，不忘開發入門機種；最新型號Xperia M僅售$2,098，並罕有地提供螢光黃及螢光紫色，帶住佢開學肯定恨死其他同學仔！

售價︰$2,098/各

的骰弧底設計

手機愈出愈大部，但講真，用「多士」咁大部機嚟傾電話未必個個Like，所以Xperia M轉玩的骰，4吋屏幕機身拎上手同部iPhone 5差唔多，重量更只有115g，隨意可放落褲袋。外形上它貫徹Xperia L等入門機嘅弧底設計，流線得來不失手感；同時機框、快門掣及開關掣以金屬打造，比不少中階機還要落本。顏色則在黑、白以外，追加螢光黃及螢光紫，不但搶眼，表面還經過霧化處理，防污能力唔錯！

屏幕解像合格

二千元左右的入門設計，屏幕質素自然有所犧牲，只有854×480解像度，講真好難同720p甚至全高清屏幕比較，惟小記以《激戰》高清Trailer測試時發覺，其清晰度比預期中好，張家輝嘅朱古力肌深淺有序，表現合格。而鏡頭算扣分較多的地方，僅得500萬像素，連好多國產機都不如，以相論相，在日光下成像尚算不俗，但室內就稍嫌雜訊偏多，幸好它支援HDR模式兼備有LED補光燈，太暗時可作補光之用。

屏幕只有4吋大，而且邊框幾粗，屬入門機格局。

開關掣及音量鍵以金屬打造，夠晒質感。

厚度僅9.3mm，配合微弧機背，手感不俗。

效能夠玩轉珠

效能方面，Xperia M用入門機常見的Qualcomm MSM8227 1GHz雙核心處理器，配合1GB記憶體，雖然速度唔算高，但撥頁、開Apps都流暢唔窒，除非玩大食Game，否則一般轉珠遊戲也應付有餘。雖然新機走平價路線，但電池容量依然有1,750mAh，3G模式下夠講9小時，嫌唔夠的話還可開啟STAMINA省電模式，在待機時可選擇只同步《WhatsApp》或《Line》等通訊Apps，其他一概關閉以延長續航力。