新男人 樂活靚造詣 分身愛美麗
以前就話「幸福美麗」四字係女人專用，但時代唔同，男人都愈嚟愈識得打扮及享受，甚至出盡法寶將「美麗樂活」至理名言據為己有。
職業與美麗掛鈎的星級化妝師Will Wong，天生一幅酷男相，是大明星張柏芝、林嘉欣等御用化妝師；卸下工作身份做爸爸時，又開童裝店為囝囝潮作Chok打扮；面對真我時，更玩埋高檔相機捉緊美好點滴。新世代男人分身有術，將美人、美事、美景盡集於一身，箇中樂活樂趣，由他親自娓娓道來。
化妝師面譜：零認識 創星級招式
Will曾做過藝人拍電影拍廣告，幸運地認識師傅Rick Chin，20歲開始便跟隨師傅與大明星如梅艷芳、劉嘉玲等化妝。由起初連甚麼是粉底都不知的黃毛小子，到現在成為被張柏芝、林嘉欣、Angelababy點名御用的星級化妝師。身價暴升當然開心，但最大滿足感是來自客人的笑容，他說：「誇張啲講，客人由死灰嘅樣到化完妝叮一聲咁變靚，見到佢哋對住塊鏡滿意咁笑同好雀躍咁走，嗰種滿足感真係不可言喻。」
對於Will能成功殺出血路，當然會有吃不到葡萄的人酸溜溜的說：「佢死好命化親都係靚女，咁化唔化妝都靚啦！」無法，天生麗質的靚星都總是找他化妝，的確，Will的Creative妝容不多，但他說自己是比較實際：「我偏好化完美無瑕嘅妝容，尤其個Base要做得好好係時間浸出嚟。我想做到嘅係好似瑪麗蓮夢露咁，簡單的眼線或紅嘴，已經可以好靚，甚至Timeless、Long-lasting。」
潮父親造型：童裝店 轉戰大改變
自稱為「街童爛仔化妝師」的Will，最愛黑、白、灰的鬆身型格打扮，更愛漂染頭髮，訪問當日表示頭髮褪色不敢上鏡，要戴Headband遮掩。扮靚型男愛靚程度延續至囝囝Kurtiss，令孩子衣着裝扮亦有其影子，他說：「以前仲誇張呀，我擺明要同囝囝同一個Look父子裝！」
Will甚至在上年與友人開設樓上童裝店Leah & Kurtz，主攻日韓直送的HYSTERIC MINI、A BATHING APE、X-girl、X-LARGE等童裝潮牌，入貨後更即時為囝囝打造Total Look。他說：「佢以前唔鍾意戴帽，但見我成日戴就開始跟住戴，依家又識得自己揀衫，着上身後仲會跑去鏡前左照右照。」
好丈夫倩影：玩相機 捉奇妙時期
生活整天圍繞在美人美景中，拍攝留念自然成為Will的嗜好之一。奈何只是攝影初哥，花5萬多元買部相機被笑「無咁大個頭唔好戴咁大頂帽」，對此，Will一笑置之。其實，Will的弟弟B Wong是行內有名攝影師，他又曾與Wing Shya合作時玩過相機，受專業人士影響，對攝影及器材有一定要求。
他說：「我最喜歡影相時『咔嚓』嘅快門聲，簡單啲講係有型，而且影像重疊式聚焦時，好有舊式菲林味道。」初時更想影老婆臨盆最美一刻，結果：「但好好笑，我喺囝囝出世嗰刻呆咗，最後都只係臨急用iPhone影！」這位愛美麗潮爸真搞鬼！
撰文：郭可儀
部分攝影：胡淑儀