Jocelyn繾綣石頭盟
有「翻版關之琳」之稱的名模Jocelyn Luko，與老公Anthony Sandstorm一向出名恩愛。Jocelyn笑言婚姻就是要將兩人「合二為一」！相識八年，二人攜手旅遊，一同參與公益活動，於尼泊爾興建學校，就連所有的積蓄都統統存入同一戶口，無分彼此，對於Anthony求婚時所送的石頭更是珍而重之。
Jocelyn因貌似關之琳，初來港即迅速打響名堂，發展一帆風順，留港似乎理所當然。但原來當年她一心要到紐約發展，只因遇上Anthony，才令她決意留下，成為她人生的轉捩點。「我第一次見到佢係喺曼谷，因為我哋係同一間經理人公司。我對佢一見鍾情，之後我哋有機會一齊嚟香港做嘢，我哋好快就開始拍拖，拍咗一個月已經同居。本來我諗住做完嘢就返紐約，但如果佢要去紐約做嘢嘅話，一定要申請visa，所以我哋當時就決定留喺香港。」
浪漫求婚
感情發展一日千里，Jocelyn大讚Anthony時常把她放在第一位，又夠晒細心！「佢成日都會做好多好sweet嘅事，而且佢個人又好風趣！呢個係我好快就愛上佢嘅原因。」最令伊人甜在心頭的事，莫過於他的求婚過程！「佢喺屋企地下，用玫瑰花瓣砌成一個心形，再喺正中心用首飾盒放咗粒石頭。可能你會諗，佢送粒石頭畀我做乜？你知唔知雄性企鵝，喺向心儀對象求婚嘅時候，會送粒石頭畀對方。如果對方接受咗，佢就會成世都只愛佢一個！係一生一世嘅承諾，真係好sweet！我從來都唔着重物質，呢啲簡單而滿載心思嘅事，先至係我最想要嘅。」面對這麼浪漫的求婚，每個女生都定必暈晒大浪！雖然話心思比物質重要，但求婚又豈能沒有鑽戒？「佢將求婚戒指戴咗喺我哋隻貓Simba條頸上面，我每次見到佢都會諗番起當日嘅情景。」
熱心公益
Anthony的心思固然功不可沒，但二人的興趣相近，亦是他們一拍即合的原因之一。他們同樣喜歡旅遊及參與戶外活動，於拍拖初期，他們暫時放下手上的工作，在一個月之內到新加坡、香港、韓國、泰國等地遊歷，締造不少美好回憶。除此之外，他們亦同樣熱心於公益活動，更於尼泊爾興建學校，讓小朋友有機會學習。Jocelyn說：「佢喺我生日嗰陣帶我去尼泊爾，我哋就係嗰個時候決定起學校。佢真係令到我嘅眼界擴闊咗好多！我喺佢身上學到好多嘢，佢係我心目中嘅英雄！」
完美情人
雖然Anthony是一個100分情人，但大家都不禁問Jocelyn：「你唔介意佢收入少過你？」對此，Jocelyn一笑置之。她坦言自婚後，二人都把所有積蓄存到同一戶口，大家無分彼此。「我哋結婚，就係希望將兩個人變成一個人。我哋唔會計較邊個賺得多錢啲，只會互相支持大家。」但愛夫心切的Jocelyn，亦落力為老公抱不平。「其實佢除咗模特兒工作，仲有做DJ同拍戲。而且佢依家全力打理緊我哋就快開嘅健康醫療中心，呢個係長遠嘅生意。因為遲啲老咗，又或者生咗小朋友，我可能就會淡出模界，所以佢依家係為咗我哋嘅將來作好打算！」
互相尊重
二人由拍拖到結婚，直至現在結婚三周年，八年間，他們的感情從未變淡，反而愈來愈恩愛！Jocelyn透露保持恩愛的要訣在於多溝通、互相尊重，以及別把對方的存在當成理所當然的事。「我每朝起身，見到Anthony喺我身邊，都會覺得好感恩！其實相處得耐，都總會有摩擦，不過我哋互相承諾咗，無論點都唔會鬧對方，因為嗌完交之後大家都會唔開心。我哋會選擇將心裏面嘅想法全部講出嚟，平心靜氣咁討論，一齊將問題解決。」
初嘗當母親心情
雖然尚未生兒育女，但Jocelyn及Anthony卻視家中的兩隻寶貝貓Simba及Nala如自己的仔女。Jocelyn笑言養寵物跟養育子女一樣，是一生一世的承諾，小貓生病更令她初嘗為人父母的心情。「有一次帶Simba打完針之後，佢就開始不停喘氣。嗰時我好驚，即刻帶佢睇醫生，畀佢食藥，又買埋空氣清新器返屋企，希望減輕佢嘅痛苦，好彩佢好快冇事，我都放下心頭大石。我真係唔夠膽想像，萬一我真係生咗仔女，而佢哋病嘅話，我到底會有幾咁緊張！」
開健康醫療中心
Jocelyn與Anthony花了兩年時間去完成一個神經語言程式學課程，並順利考取專業資格。Jocelyn透露：「因為我媽媽之前病咗，我做咗好多資料搜集，發現一個人嘅健康，係受飲食習慣、精神狀態、思考方式等等所影響。學呢個課程，除咗希望幫到我媽媽之外，亦希望幫到更多人！所以我哋啱啱同一位醫生朋友合作，合資開一間健康醫療中心，將會喺八月尾開幕。」
採訪：龔凱欣
攝影：黃叔榮
服裝：ESCADA & ESCADA SPOR