楊秀惠雖然不是在香港出生，但留港五年已感染「港女」公主病特徵：貪靚、虛榮、鍾意撒嬌，對於種種「指控」，秀惠即呼冤挺身平反！

曾參加2004年國際華裔小姐競選的楊秀惠，雖然沒有得到任何獎項，但仍決定留在香港發展演藝事業，並獲無綫器重。不過，秀惠初來香港時曾因語言不通，有過一段不快樂的日子，她說：「做藝人係我第一份工，因為唔識講廣東話，見到人都唔敢出聲，成日匿埋喊。不過我份人較硬頸，覺得唔衰得就的起心肝學好廣東話。」

貪靚？

不經不覺，秀惠入行近五年多，事業穩步上揚，不停接劇、拍廣告，但隨之亦惹來不少是非。早前有傳秀惠因貪靚打botox失敗，令俏臉歪埋一邊，對此她否認謂：「細個時包包面，大個收咗啲baby fat，加上有做運動減肥，連塊面都減埋。（反唔反對整容？）如果令個女仔重拾信心係可以接受，但我唔會，怕將來老公唔鍾意呀！」所謂人言可畏，就連過氣緋聞男友孫耀威都「加把口」暗笑她歪臉是貪平之故，秀惠沒好氣說：「最初都有唔開心，但做呢行係咁，新聞多數負面，自己知乜事，其他人講乜都唔理得咁多。」

虛榮？

愈大愈靚女，追求者自然源源不絕，與秀惠傳緋聞傳得最盛莫過於孫耀威（Eric），有傳秀惠在派對上因見Eric攬女而崩潰嚎哭，她直言對報道感到煩厭：「會幾煩，根本大家只係朋友，圈中仲有其他好朋友。」與Eric劃清界線後，秀惠又火速搭上出身富貴之家的《東張西望》主持人蘇晉霆，之後又約會富貴中年漢到圓方睇戲，感情生活多姿多采，但她一概否認：「佢哋都係朋友，現階段仲未搵到好鍾意嘅人，全部純屬煙霧，冇個真！」

每個女孩子都希望能結婚生仔，秀惠當然不例外，不過一向眼角高的她被指專攻「有米」一族，她卻為自己平反：「唔可以話貪錢，但拍拖都要啱性格，老實講自己怕污糟，有啲地方我唔會去，又怕同人逼巴士、港鐵，所以一定要揸車，可能對自己有要求，所以認識嘅朋友亦自然地想佢哋聰明啲，自己笨都要搵啲聰明人做朋友，咁先學到嘢。」秀惠揚言恨拍拖，她說：「恨搵一個照顧我嘅男仔，身邊好多朋友都結咗婚，我都想學陳慧琳、謝安琪咁，結婚、生埋BB都可以有自己事業。」

公主病？

秀惠男性緣極佳，問到可擔心被人誤會為「十三點」四圍放電？她笑說：「其實我好男仔頭，說話粗魯，成日畀朋友話我惡，早前我去澳門玩，其中一個男仔朋友仲話：『秀惠，其實你都幾惡，講嘢好strong。』勸我要斯文少少，哈哈。」

難怪早前秀惠接受雜誌訪問時，曾被指「寸爆」，她直言當上一課：「可能係言語間嘅誤會，但冇所謂，咁就學到嘢，教自己唔可以再咁講。」

生長在小康之家的秀惠，坦言自小被屋企人寵壞，有時會忽略別人感受，她解釋：「以前成日發脾氣，但個個都好遷就我，爸爸媽媽有時都會鬧，但自己都係唔肯改。」不過人始終會成長，秀惠一個人在港生活，嘗過苦頭已學懂做人處世，她帶笑說：「以前太早叫我起身會發脾氣，依家每日瞓幾個鐘就得，阿妹笑我好似用咗強力電芯，以前成日要叉電，依家用幾日仲龍精虎猛。」

前輩錫晒

自認嬌生慣養的楊秀惠，難得能認清自己，加上心直口快的個性，其實蠻得人喜歡，尤其是一班前輩藝人更對她呵護備至，她笑說：「初入行時同米雪姐合作拍電視劇，因為唔識着衫搞到成日冷親，米雪姐好好人，帶我去花園街買衫，離鄉別井都有人關心，真係好感動。」

華姐發展 各自精彩

好多人話入娛樂圈可以豐盛人生，楊秀惠便是一個好例子，而她的一班華姐好姊妹來港後亦各有不同的經歷和發展：

廖碧兒

01年國際華裔小姐冠軍

由溫哥華來港的廖碧兒最初連廣東話都唔識，經過幾年磨練，除拍港劇外，早前更有機會到荷里活拍電影，一嘗做打女滋味。

鍾嘉欣

04年國際華裔小姐冠軍

一向是乖乖女的鍾嘉欣，拍電視劇之餘，去年更有機會出唱片做歌手，並獲IFPI頒發唱片銷量獎。

陳法拉

05年國際華裔小姐亞軍

法拉未入行前曾擔任日本《JJ》雜誌模特兒，入行後即成為「性感女神」，更傳戀上Neway太子爺薛世恒，半隻腳踏入豪門。

採訪：專案組

攝影：司徒國榮

化妝及髮型：Miu Fung @ Beauty Tech

服裝及場地：Fornarina