絲絲講場：財圈鬥牛 疫下照出利是封
踏入牛年，農曆新年傳統拜年派利是嘅環節都要轉轉新意，眾所周知，好多傳統銀行、電子支付平台、虛擬銀行都爭相推出「電子利是」功能，但估唔到金融地產圈仲有班長情公司，專誠設計實體利是封，不但令人眼前一亮，又可以為大家增添節日儀式感。
講起牛，相信一眾股民最鍾意，最好日日牛氣沖天，所以2021牛年當然憧憬牛市發大財，券商嘅利是封都別出心裁過人。網絡券商富途就相當識玩，由自家牛牛公仔擔當利是封嘅封面，背後開口位置又見到牛樣，輕輕一拉就有新年賀句，可謂牛氣逼人。
耀才團年飯重金搞抽獎
當然，唔少股民都會記得耀才證券（01428）招牌「一世易發」嘅醒神利是封。絲絲早前就八到，耀才繼續秉承傳統搞「團年飯」，員工最期待嘅抽獎環節亦冇甩拖，更人人有份，永不落空，個個開心過肥年！聽聞今次抽獎禮品涉及超過6位數字，包括電子產品、家居電器、購物禮券及現金獎。
余絲韻