絲絲講場：養成8習慣金錢心靈皆富裕

話說，科學家一早做咗統計同研究，得出以下八點，如果唔養成以下習慣，即使你幾聰明、快樂又有錢，都只會更窮、更蠢同更悲哀！

保持良好睡眠質素

心理學家提醒，如果大腦一直處於疲倦狀態，對短期同長期記憶都會有負面影響，因為人嘅注意力同籌劃能力變差，長遠更會影響創新能力。所以就算煩惱多多，都要維持高質素嘅睡眠。

減吸糖分 保記憶力

食得多甜食唔單只容易蛀牙，原來仲會影響大腦表現。有研究指出，血糖過多會影響記憶力。因此大家要謹記，「健康先係火車頭」。

低脂飲食 添靈活度

除咗上述提到嘅「糖」，亦唔好食太多蛋糕或煎炸食品，有研究做實驗後得出，高脂飲食會嚴重影響認知能力同埋靈活性。

給予大腦充分休息

以為「一心多用」係最醒？其實咁樣只會影響生產力，仲會影響心理，使大腦疲於奔命。由於大腦會控制情緒、影響決策，仲有同理心等，一旦大腦長期疲勞，最終將會影響埋記憶力。

減少開會提升智商

不停地開會其實是「低IQ」行為，隨時令到人智商倒退。有研究指出，長時間開會只會令你變蠢或笨拙。

適當減壓有助瘦身

長期壓力會刺激交感神經同埋腎上腺素，令大腦更難有新記憶，仲會引起心血管疾病、腸胃病等。而且仲有研究話，壓力會造成食欲增加、脂肪堆積，即係會有肚腩，想着條靚裙Show Off都難！

學識放鬆 甘於平凡

唔好追求自己係全知全能，無人可以喺全部範圍上出眾，即使單計金融學呢一科，亦唔能夠全部都學識。謹記放鬆，團隊精神遠勝單打獨鬥。

作息不定 善用小休

如果你係空姐空少，或者醫護界等經常返唔同時間嘅工種，作息唔定時，就要留意啦！咁樣長遠會影響你嘅認知能力，如果不能避免，就要謹記好好利用「小休」時間。

成日瞓唔好 李偉傑驚退化

大中華投資策略研究學會副會長（港股）李偉傑（Jason）話，八樣入面自己中咗七樣，剩係「開會」冇中，都怕自己會「退化」添！

佢話夜晚做完訪問後，瞓覺時都會繼續諗住經濟同股票問題，瞓得唔太好，所以平均一日瞓六、七個鐘都唔係好夠。而日常工作嗰陣，既要幫客落盤，又要接受訪問，長期處於作戰狀態，所以壓力都幾大。

放假自己煮 食得健康

至於午餐，成日都要食飯盒，唔多唔少飲食都高糖、高脂，所以佢惟有靠平時放假得閒，自己下廚，食得健康啲咁話。

余絲韻