絲絲講場：索羅斯六招叱咤全球

1.亂局之下機遇處處

凡人眼中嘅「混亂」，喺佢眼中就係機遇。金融市場天生就係唔穩定，只要你能辨識混亂，就可能致富，而且愈亂愈能發達。

2.肯認輸 狠心斷捨離

大部分投資者都係「唔捨得」，升唔捨得賣，跌更唔捨得賣，最後往往喺最低位離場。索羅斯與眾不同嘅最大能力，就係好快察覺過錯。

3.以史為鑑 預測未來

索羅斯成功預測八七年股災，秘訣就係以史為鑑。歷史經驗往往可以預測未來，因為歷史係會重演。

4.睇領導人言論買貨

一啲平淡無奇嘅說話，在索羅斯聽起來可以係重要嘅買賣信號，佢專門留意各國領導人講話，從而搵投資契機。

5.小道消息有助獲利

七二年嘅一個晚上，索羅斯收到風美國某銀行招待證券分析師吃晚飯，過去係從未發生過嘅事，佢敏銳地認為必有不尋常事情發生，立即買入銀行股，果然獲利五成。

6.緊記冒險時咪瞓身

佢有一個戒律，就係冒險時唔會將整副身家作賭注，唔會將所有雞蛋放同一個籃子，所以佢從來都不會被市場「挾死」。

余絲韻