繼《功夫之王》後，已有一段時間無拍荷里活電影的成龍，最近接拍合家歡動作西片《一屋特工隊》。早前成龍受訪時，大談拍攝《一》片時的感受，更坦言最難是在小朋友面前講英文！
成：成龍 記：記者
記：響《一》片，你認為拍攝動作特技鏡頭辛苦抑或係演方面較困難？
成：反而係講英文，尤其係喺小朋友面前講。因為如果佢哋跟唔到你嘅對白就好麻煩，加上佢哋又講得好快，同埋導演想我講得比較唔同，所以有時都令我幾煩惱。動作特技方面當然冇難度，因為我已經做咗好多年。不過因為有小朋友在場，所以就算動作場面親身上陣係好容易，但都要非常小心，確保佢哋嘅安全。加上呢套係合家歡電影，要同導演商量每個動作嘅可行性，必須百分百適合兒童觀看。
記：《一》片嘅動作鏡頭同之前嘅成龍電影有咩唔同？
成：冇飛來飛去嘅場面，都係好生活化嘅特技，好似跳上屋頂、喺小朋友身邊打鬥等，用順手拈來嘅雪櫃、微波爐、煙灰缸，甚至南瓜等，總之用盡所有身邊嘅嘢。咁至係最典型嘅成龍風格，並非飛天遁地嗰啲。
記：你喺片中商場嘅一場特技，令我想起《警察故事》中一場商場戲。
成：《警》片嗰場戲簡直就係瘋狂！但願當時我哋夠錢將拍攝情況拍成紀錄片，嗰場戲背後實在有好多故事。
記：咁拍《一》片嗰場戲，有冇令你諗起《警》片？
成：冇，因為依家拍攝呢種場面安全得多。工作人員會確保條鋼索好安全，加埋其他安全措施，令我有信心去跳，當然都會驚啦。依家諗起《警》片商場嗰場戲，就等同自殺！
記：同女星Amber Valletta合拍嗎？
成：佢嘅表現好好，佢絕對係一個真正嘅女演員。佢喺英文上幫咗我好多，不斷提點我。拍動作鏡頭佢亦表現得好出色！
記：佢喺戲入面摑咗你一巴！
成：我拍攝時根本就唔知導演會以唔同鏡頭拍，我每次都忍住痛拍攝。我相信世上無邊個演員可以好似我咁忍得痛。你可以問吓Amber摑咗我幾多次。
記：你拍過好多好多部戲，你點樣以開心嘅心情去拍每一部戲？
成：如果你叫我繼續拍攝《火拼時速》嘅話根本就唔會令我開心，因為我希望拍唔同類型嘅電影。例如我之前嗰部《新宿事件》，故事好沉重。所以拍完之後我想改變一下，於是拍攝《一》片同《大兵小將》。當我拍華語片時我有好多選擇，但拍攝西片我只有較少嘅選擇，因為係佢哋（電影公司）揀我去拍。喺美國，電影公司根本就一定唔會畀我拍類似《新》片嘅故事，佢哋會搵羅拔迪尼路去演呢類電影，但其實我都可以拍呢類電影o架！所以我好開心可以拍到《功夫夢》，喺入面我留鬚、蓄白頭髮扮老人家，因為我好想畀觀眾知道，我唔係動作巨星而係一個演員。
記：《火拼時速》係咪唔再拍第四集？
成：我諗唔會喇，如果真係開拍，咁就絕對係奇迹！
大賣溫情的《一屋特工隊》，除國際巨星成龍外，甚少演戲的著名鄉謠男歌手Billy Ray Cyrus（歌手Miley Cyrus父親）亦有份演出，飾演成龍在中央情報局的工作拍檔。
最有趣的原來成龍亦是Billy Ray的歌迷！成龍說：「我之前已聽過Billy Ray嘅歌，好高興喺片場見到佢，我哋見面之前，我仲特登去買佢嘅CD畀佢簽名，佢嘅口音真係好特別！」而Billy Ray亦對成龍讚口不絕，指成龍做事要求完美，每次拍畢一場戲，都是第一個跑去幫攝製隊收拾器材的人。
文：外娛組