絲絲講場：想成功先要克服「檸檬人生」

「葡萄人生」係講甜到漏嘅人生都要經歷辛酸。要釀製最好嘅美酒，除咗要上等葡萄，亦要「瘦瘠」嘅土壤，因「瘦瘠」土壤有助葡萄樹深入唔同土質層，吸取唔同養分，咁就可以釀出口味同香氣都十足嘅靚美酒。而「檸檬人生」係指酸到澀嘅檸檬，無咩人鍾意就咁啃，但如果將佢榨成汁，加水同糖，再倒入蜂蜜，就會變成人人愛喝嘅檸檬汁。

本田創辦人：「傷」手奉獻電單車

其實唔少名人都經歷過人生的酸與甜！日本汽車巨頭之一嘅本田，已故創辦人本田宗一郎之所以研究出電單車，全靠一雙傷痕纍纍嘅手。本田喺二次世界大戰結束後，見到妻子日日要辛苦踩單車去購物，心諗「如果單車可以加個引擎就好」，於是開始研究電單車，左手畀錘整傷晒亦在所不惜，到咗八九年終於成功。佢經常話：「其他人只睇到我1%成功，其實我經歷過99%失敗。」

鱷王：從破產學識恐懼謙卑

新一代「鱷王」達利奧曾經透露自己八二年破產，而呢段經歷令佢學識「恐懼同謙卑」。佢仲坦言，正正係有咗這段經歷，先至會有今日管理住超過千億美元對沖基金資產、總管理資金高達1,500億美元嘅Bridgewater。

達利奧

博格爾

基金之神：先天心臟病 心力交瘁

已故「基金之神」、曾為領航基金創辦人博格爾（Jack Bogle）生前接受訪問，回顧自己31歲正值搏殺階段時，某日突然心臟劇痛，經診斷後發現患上咗先天性右心室發育不良，心律失常，令佢心力交瘁、精神崩潰，而心臟病纏繞住佢，直到65歲接受心臟移植手術，先可以繼續活下去。所以佢勉勵年輕人，唔好剩睇人哋風光。「人生任何一個挫折，只不過係生命嘅一小段插曲，唔值得太在意。」

喺創富路上，要經歷千錘百鍊先會攀得更高。疫情終有日會過去，與其苦惱，點解唔笑住面對？

余絲韻