絲絲講場：港人諗退休 愈老愈貼地

摩根資產管理十月份做咗個退休準備調查，尋日公布結果，發現講到退休期望，唔同年齡層之間原來有明顯嘅代溝。

上班族擬儲360萬上岸

30至40歲港人平均估計自己可以喺61歲退休，覺得有360萬元儲蓄就夠。反而較年長一代，51至60歲嘅受訪者，就話要有430萬先夠，仲預計自己要做到64歲！至於概括所有年齡層，就估計要儲390萬元先夠退休。

邊個諗法實際啲？嗱就咁嘅，摩根資產管理話，審慎嘅退休計劃應夠用30年或以上，考慮埋通脹影響，390萬呢個數等同每個月可以使萬四蚊：之但係，如果全面停止將筆錢繼續用作投資，而齋靠存Cash收低息，咁就會跌到每月得番7,000蚊使！

嗱再睇埋政府統計數據，一對普通退休夫婦通常每月使費係2萬蚊，呢個係截至一四/一五年嘅數據，今時個數肯定再高啲！

年長一輩投資較進取

估唔到嘅係，30至40歲受訪者嘅現金同保險佔退休投資組合有成36%，略嫌穩陣過頭；進取嘅反而係51至60歲嗰啲，將三成積蓄投入股票，唔通係臨近衝線博盡啲？話時話，閣下又心裏有數未？

余絲韻