絲絲講場：印尼商銀一點一滴慳出佳績

講嘅係印尼最大私營銀行Bank Central Asia（中亞銀行，BCA），話說Armand Wahyudi Hartono喺一六年中升任該銀行董事副總經理，佢上場幾星期，發現員工放工枱面留低半杯水，第二朝立即下令限制銀行總部提供嘅飲用水量。

節約用水 上網設限

「唔浪費」可以話係BCA嘅公司文化，唔單止水，佢哋所有員工上網都有指定Quota（配額），話之你係高層定前線，都一視同仁要遵守。就連會議室亦唔係免費任用，有需要用到嘅部門，唔該畀錢。

辣得滯？又未必，比着你喺自己屋企，咪一樣會咁慳家，唔該將心比己。

再講，銀行最重要係向股東交代，睇番BCA嘅營業開支與收入嘅比率為63%，係當地大銀行中最低；該行盈利年年增超過10%，唔係單單一、兩年，而係過去十年有八年係咁。講到股價，今年至今已升咗19%，帶挈公司市值多咗約90億美元，現達540億美元。咁嘅成績，對股東夠晒有交代！

古語有云：「儉，德之共也」。See！個「儉」字幾緊要！

余絲韻