為揀心水股可以去到幾盡？有基金經理直頭要上堂學美國FBI（聯邦調查局）套盤問技巧，嚟試探啲公司高管係咪靠得住，以決定隻股揸唔揸得過！呢套盤問秘技，精髓就在於問四個問題。
話說，Pengana Australian Equities Fund嘅高級基金經理Rhett Kessler真係當正自己係FBI，每間投資目標公司，佢都會見吓啲管理層，仲逐個開檔案。
佢嘅盤問秘技係，會問對方四個刻意射歪嘅問題，至於會暴露對方弱點嘅重點問題，反而特登唔問唔提，睇對方會否向自己坦白招供。
另一招係，每問十個問題，當中有三、四個係明知故問，目的睇對方有冇誇大成就或刻意淡化弱處。
Kessler話，上述招數，測謊現形率達九成。佢又發現，所有CEO（行政總裁）都會吹大啲，「潤飾吓」事實就預咗，只係當「潤飾」超過四倍先要擔心。至於CFO（財務總監），就相對少講大話，不過一旦講起上來，個大話就會好離譜。
呢條橋Work唔Work？就咁，自個基金○八年成立，Kessler就一直用呢個方法揀股，個基金成立十一年以來嘅年度化回報達10.4%，明顯跑贏澳洲股市一大截。
余絲韻