絲絲講場：葉氏化工白板漆玩謝副CEO
化工產品製造商葉氏化工（00408）旗下駱駝漆有隻專業白板漆，不過就因為呢隻漆嘅特點，搞到公司副行政總裁葉鈞（Francis）喺屋企非常頭痛。
話說，呢隻漆只要髹一層，牆身就會變白板，牆上畫嘢，一抹就甩。佢同絲絲講，為咗畀屋企嘅小朋友發揮創意，佢同太太揀咗一幅牆嚟髹白板漆，小朋友好Like呢幅「白板」牆，仲周不時喺上面畫畫。
小朋友唔覺意畫過界
聽落好完美啊，因咩事覺得好頭痛呢？事關隻漆嘅特點係完全透明，一啲都唔影響原有牆身顏色，於是邊幅牆髹咗、邊幅無髹，根本就睇唔出，亦唔覺。咁小朋友開心得滯就……畫埋隔籬幅牆囉！見到佢哋咁開心，真係唔知嬲好定笑咁話。
見Francis「呻」嘅時候仲係笑笑口，即係冧多過嬲啦。佢仲呼籲屋企有小朋友而又想整「白板」牆嘅朋友，記得事先框住有髹白板漆嗰幅牆，以免小朋友踩過界喎！
力研新塗料 攻家庭客
除咗白板漆，公司仲努力研發新產品，例如一啲特殊效果油漆，髹完會有雲石紋之類。
佢仲話，塗料業務將會成為公司主要嘅增長動力，尤其係家庭客戶，所以嚟緊會繼續投放資源提升品牌形象同完善分銷渠道。
余絲韻