絲絲講場：抖音搬辦公室與Fb打對台
早排社交媒體Facebook創辦人兼行政總裁朱克伯格嘅公司內部會議錄音洩出，畀全世界知道咗朱仔有幾驚輸畀抖音。難怪佢擔心，喂想像吓，有個後生過你嘅女士好「欣賞」你老公，不但時常五餸一湯希望你老公賞面，最近仲搬咗去你兩夫婦以前老家住，而且就喺你哋現時屋企後面......嗱抖音就係咁進取，唔係唔驚呀嘛！
高薪挖角 搶歐美用戶
話說，抖音最近喺硅谷開咗個新辦公室，正正係Fb旗下WhatsApp嘅舊Office，好近Fb總部。唔止咁，抖音仲出高兩成人工向Fb挖角，自舊年計起，就至少已經撬走Fb廿幾人！
查實抖音由Day One就已逼埋Fb身。抖音母公司字節跳動一七年推出抖音嘅國際版「Tik Tok」，之後收購埋Musical.ly，吸收龐大歐美用戶，紅爆歐美，聽講至今全球下載次數已逾9.5億次，現時每日活躍用戶有700萬。
雖則抖音每日活躍用戶仍比唔上Fb現時嘅2.1億，不過Fb呢2.1億係包埋IG、Messenger同WhatsApp喎！而廣告個餅係得咁大，抖音要賺錢，去搶原屬Fb嘅廣告就梗啦！
點解咁多人迷抖音？佢好玩之處在於，乜人都可以為自己製作MV片自Hi一番。逢可自Hi嘅嘢，幾時都易上癮啦！
余絲韻