絲絲講場：債券天王：中美有共同敵人

氣候變化加速人類滅絕

一講起中美貿易糾紛，Dan就即刻話好擔憂。佢仲好語重心長講，中美兩國唔應該再鬥落去，反而應該望真咩嘢先係雙方嘅共同敵人，就係迫在眉睫嘅全球氣候變化問題！

佢警告，人類滅絕將比想像中快！就算中美喺貿易爭拗上未能完全停火，都至少一定要達成部分協議，等雙方有合作空間，一齊拯救地球，為大家嘅子子孫孫建設更好嘅未來。佢提到兩國可合作嘅範疇，包括互相分享氣候或醫療等科技研發成果。

Dan幾乎每年十一月都會嚟香港，其實早喺今年六月時，佢已經電郵絲絲問香港情況，仲希望大家平安，會一直為大家祈禱。而佢亦打算等局勢穩定番啲後返嚟，再同絲絲一齊上山頂俯瞰維港。

其實呢幾年同Dan嘅交流中，絲絲學到唔少嘢，曾經問過佢人生點先過得有意義，佢就話：「做每一樣嘢都要以所有人嘅利益為依歸，大家可能覺得我傻，但我係從父母及太太身上學番嚟，有實踐到之外，亦希望啲仔同孫繼續跟呢套方式生活，活出燦爛人生。」

余絲韻