絲絲講場：耀才太子女三年後接棒？
本地證券商耀才證券（01428）主席葉茂林千金葉頴恩（Jacqueline）加入公司一年，身為主席助理就梗係忙啦，不過，努力係有回報嘅，爸爸葉生就畀囡囡100分啦。
嘩！滿分係咪即係可以隨時交棒呢？未有咁快！葉茂林就話希望三年後可以正式交棒。
無懼氣氛差 續拓業務
不過，Jacqueline就笑言，其他上市公司主席做到90歲先退休，爸爸有排先到啦！佢仲話，嘢係學唔完，跟爸爸可以學多啲真功夫！
至於近期社會氣氛較差，公司會唔會裁員呢？佢強調，公司正積極拓展業務，唔單止唔會裁員，仲會繼續請人添！
咁股民最關心嘅大市又點？葉茂林話貿戰唔係短期可以解決，預計恒指最差跌到24,000點。行政總裁許繹彬就睇淡科技、出口同零售股，看好傳統板塊如內銀同內險。另外，公司下星期亦會推出美股、美期業務。
余絲韻