絲絲講場：LV主席超蓋茨登富豪榜阿二

外電報道，根據最新公布嘅彭博億萬富翁指數顯示，法國奢侈品牌路易威登集團（LVMH）主席伯納德（Bernard Arnault）身家首次突破千億美元，超越蓋茨成為全球第二有錢嘅人。話說今次係蓋茨自該指數誕生七年以來，排名首次跌出頭兩位，認真慘慘豬。

身家逾千億美元

講番伯納德啦，佢現年70歲，今年隨着公司股價飆升，佢副身家就增加咗390億美元（約3,042億港元），淨資產值達到1,076億美元（約8,392.8億港元），計番條數，係彭博億萬富翁指數首500位當中，財富增幅最多嘅一個。

之不過，其實佢只係比蓋茨啱啱多咗2億美元咁大把。絲絲真係想睇吓，伯納德第二位呢個寶座又坐得幾耐呢？

貝索斯遙遙領先

至於全球最有錢嗰位貝索斯，最新身家就達到1,250億美元（約9,750億港元）。

等絲絲計計條數先，淨係千億富豪榜前三位，即係貝索斯、伯納德同蓋茨嘅身家，夾埋就超過咗標準普爾500指數中幾乎所有公司嘅個股市值，都咪話唔威。

余絲韻