絲絲講場：百威亞太上市投推齊齊「隊啤」
全球最大啤酒商百威英博（Anheuser-Busch InBev）旗下百威亞太（01876）尋日中午舉行投資者推介會，以最多集資764.45億元，成為年初至今最大型新股。
200人出席勁墟冚
公司吸「人」力當然勁，個會有超過200人出席。絲絲聽聞，當時多人到唔夠位坐，有啲仲要企足全程。
不過公司好識做，提供啤酒任飲，絲絲眼見酒店職員不停運送啤酒，睇嚟投資者都幾飲得。
另外，出席嘅投資者仲會獲得一份紀念品，內有一隻啤酒杯，攞嚟裝啤酒啱哂！但估佢唔到嘅係，仲有文具套裝（包括筆記簿、鉛筆、擦膠及信封），同埋送一頂Cap帽。有與會投資者就戴住頂Cap帽走，認真撐場！
有與會嘅投資者話，以市盈率計，百威亞太嘅估值比青島啤酒（00168）及華潤啤酒（00291）較高，但該公司嘅品牌夠出名，托得起個估值，而今年啤酒股表現唔錯，睇好啤酒行業咁話。
余絲韻