絲絲講場：黃國英儒學之旅照操盤！
唔講唔知，原來豐盛金融資產管理董事黃國英（Alex）每年都會請一班公司同事去旅行，慰勞吓辛苦工作嘅大家，而絲絲就收到風今年佢哋嘅行程叫做山東「儒學之旅」，估計佢哋係想感受一吓萬世師表孔子故鄉嘅濃厚文化氣息。
請員工旅行體驗文化
佢哋一行人上周末出發，今次係Alex親自挑選行程，當中佢特登安排同事們入住一間高端溫泉酒店。佢話，由於山東天氣涼爽，最適合浸吓溫泉，消除疲勞，所以儒學為虛，嘆下私家風呂先至係重點！
佢哋呢次旅程途經青島、濟南、泰安及孔子出生地尼山，行程總共五日四夜，參觀咗唔少孔聖舊迹景點，如孔子像、大學堂同孔廟等。最過癮當然唔少得體驗博大精深嘅儒家文化，Alex更同一班同事玩Cosplay，搖身一變做孔子嘅學生，喺大學堂嘅老師指導下，抄寫論語，同體驗非物質文化遺產「尼山食禮」，唔知Alex有咩深刻得着呢？
旅遊期間仍緊貼大市
但正所謂「學而不思則罔，思而不學則殆」。秉承住孔子精神嘅Alex自然唔會有違教誨，怠慢事業，所以佢喺旅程中仲要繼續操盤，睇實港股市況。不過，佢就話好在最後一晚有得浸溫泉，先可以爽完繼續衝！
余絲韻