Market Insight：內房股有調整壓力

恒指昨日最終無升跌，係就係先低後彈，但都只不過維持在「抖氣區」29,660至30,280點內，主板成交1,071億元，仲未知後市向左走定向右走；滬綜指則跌16點，呈兩連跌。

內地減低放水力度

從牌面睇，若然市況延續近期無方向咁行落去，資金選擇性地炒股唔炒市之趨勢延續落去機會都幾大，故建議大家一於懶理指數，專心炒個股或板塊！

隨着美國結束對進口伊朗石油的制裁豁免，國際油價反覆抽高，紐約期油昨日執筆時再升2.5%見65.66美元，上升動力強勁，並帶動中國海洋石油（00883）以及中國石油（00857）上升1.4%及1.3%。可憐係走勢本來已經相對較弱的中石化（00386），收市竟然要跌0.3%，再一次證明，資金仍然係追買強勢股，放棄弱勢股。

故此，如果認為油價仲有得升，都係集中火力攻前兩者，後者放埋一邊就無錯。當油股有起色，航空股自然要「降落」，三大中資航空股國航（00753）、南方航空（01055）及東方航空（00670）分別跌6.5至8.5%，並開始有失守中期升軌支持迹象，若未來油價再上，短期真係唔使掂呢個板塊。

另外，仲有兩個板塊最好咪手多，分別係內銀及內房。前者主要受累中央放水力度下降，雖則未來經濟會唔會又再轉弱就未知，不過阿爺在市場上持續放水的憧憬不再，A股又升咗成季，相信點都要降降溫，作為中資股核心的內銀自然受影響，淨係睇隻重磅藍籌建行（00939）股價三連跌已可見一斑。

至於內房股，中央再次重申「房是用來住，不是用來炒」，早前就話資金博阿爺要刺激經濟，所以會撐一撐內房，但如今鑼鼓打唔響，自然要鳴金收兵。萬科企業（02202）、富力地產（02777）、雅居樂（03383）、碧桂園（02007）及中國海外（00688）分別跌1.7至4.1%，跌勢好全面。

W股具炒上催化劑

策略上，既然國策大方向明確，冇貨者短期都係靠邊站；而已持貨者，建議望吓資金流向係咪出現變化，先決定係趁高減磅，還是一刀切過全線撤退。

相對地，有港府官員表示於七月開始，「同股不同權」股份將獲納入滬港通和深港通之內。昨日見小米集團（01810）同美團（03690）分別升4.2%及1.8%，似乎短期內市場有機會繼續炒W股受惠「北水」流入。古勝建議不妨候低分段收集小米，相信勝算不低。

古勝