Market Insight：中資航空股順勢短炒

不過，若然純睇恒指牛熊證街貨分布，昨日恒指抽上31,188點，已經殺了一大批最貼價恒熊重貨區之熊仔，而且下一浸31,200至31,299點有近相當於700幾張期指的恒熊街貨等住劏；相反，恒指牛仔重貨區最貼價都要睇到29,000至29,999點，所以牌面計，大戶繼續順勢推高多浸殺熊的機會似乎較大。

徵附加費有助盈利

昨日一眾航空股受上調內地航線燃油附加費消息刺激而全線向上，南方航空（01055）、中國國航（00753）及東方航空（00670）升幅介乎1.9至4.3%不等。講真，雖然國際油價有回軟迹象，但現實情況係，由去年七月至今油價累升近六成，以致航空公司經營成本上升。

今次係事隔三年後恢復徵收內地航線燃油附加費，有望對沖航油成本，再加上內地三大航空公司今年首季度盈利均錄理想增長，趁住現價往績市盈率介乎11至14倍都唔算太貴，順勢追入仍具一定值博率。

呢期物業管理股鑊氣咁濃，確實出乎古勝意料，祈福生活服務（03686）昨日大漲21%，中奧到家（01538）升約22%，中海物業（02669）升4.5%。連帶內房股都見起色，萬科（02202）及中國海外（00688）均升4%，華潤置地（01109）則升3%。當然，板塊炒起自有其理據，若純短炒的話亦無謂去深究，反而要留意資金在板塊內輪流炒作之時，往後有沒有流走的迹象，喺未有逆轉前，順勢跟炒便可。

旺旺績後由升轉跌

相反，股民持有的股份，最慘係遇到不利消息打擊。好似阿爺下調光伏發電補貼後，整個板塊就一沉不起，加上大行開始出報告唱衰及下調目標價，相信短期內可以睇少瓣。另外，本來走勢已經夠差的五龍電動車（00729），昨日再跌12%，主因係集團大股東再遭經紀斬倉。

至於中國旺旺（00151）昨午公布截至三月底止全年業績，純利按年跌6.6%至31.15億元，遜預期，股價創完52周高位後倒跌4.9%收市。從上述事件可見，無論股份基本面幾好，只要資金鏈有問題或一個不似預期的業績，股價都隨時會被質低。

古勝