Market Insight:鋼鐵股提防虛火一場

美國總統「侵侵」的「個人瘋格」,主導環球投資市場的趨勢未變,除中美正就貿易進行談判外,上周宣布向歐盟、墨西哥及加拿大進口鋼鐵及鋁材徵收25%及10%關稅。加拿大即時作出反徵關稅行動回應,至於歐盟亦擺出姿態,提出要向世界貿易組織(WTO)挑戰美國做法。環球貿易摩擦有加劇迹象,多國互徵關稅勢必拖累環球經濟發展,歐美股市近期陰陽怪氣,確實有迹可尋。

港股上周五即市走勢沉悶,恒指及國指大部分時間窄幅波動,而兩者全日高低波幅則分別為217點及130點,可見MSCI調整比重所帶來的衝擊,遠遠大於恒指季檢。

MSCI新貴有幸有不幸

石藥集團(01093)獲「染藍」後股價升多跌少,反映基金追貨意欲甚大。至於被剔除的聯想集團(00992),股價同樣自早前低位3.5元水平反彈,近期更升穿4元關口。觀乎過去不少被剔出的藍籌都有否極泰來之表現,而聯想能否再次闖出一片新天地,除要睇其業務前景外,仲要考慮集團研究回歸A股的可能,又或是大股東聯想控股(03396)會否考慮私有化聯想集團等因素。

至於MSCI指數調整佔比後,部分中國指數新貴走勢明顯有差異,首控集團(01269)上周四創新高後,周五卻要嘔凸,收市大跌38%;近期股價反覆向上的藥明生物(02269)則繼續創新高,升3.1%。

從上述個股周五表現可見,基金雖然會因為指數佔比變動而調整持股比重,但講到尾都要睇埋個別企業前景,唔係話衝就衝,所以大家以後咪聽到某股入指數消息就衝入去!

呢期個個都講「五窮六絕」,睇番恒指五月仍守穩10月線及中期上升軌支持,但就無乜力再上;國指走勢就更加慘情,上周五收報12,020點,與10月線11,987點僅一步之遙。

這也難怪,六月有美國加息、世界盃開鑼,加上困擾五月的不明朗因素如環球貿易摩擦、歐豬政局不穩等因素亦未解決,且一旦美國10年期國債孳息率因加息因素而彈番上3厘樓上,投資市場隨時又再風起雲湧,睇怕港股六月就算唔太絕,但要大升都好有難度。

炒周期股宜見好識收

上周五較強勢板塊就要數到鋼鐵及資源股,馬鞍山鋼鐵(00323)升3.9%,鞍鋼股份(00347)升4.7%,俄鋁(00486)升1.8%,五礦資源(01208)則升2%,睇即市走勢,幾乎都係由頭升到尾。不過,須明白鋼鐵股因狂人「侵侵」的一句話而抽升,日後亦可因其他因素而回落。

同時,歷史話畀我哋知,鋼鐵股往往在經濟大環境甚好,又或有利好國策出台時才會大炒一轉,其後又反覆回落。觀乎近期市場氣氛以至政策因素皆未見有潛在利好誘因可進一步推升板塊,故已追咗貨者要睇到實,以防是虛火一場。

古勝