香港小輪（00050）尋日股東周年大會改咗安排，由以往開完會請股東食一餐午宴，改為現場無嘢食，但向每位股東派發兩張餅卡，並且一早出信通知每一位股東。
現場所見，秩序大致良好，唔少股東都理解，因為小股東人數多咗，開會地方容納唔到咁多人一齊食飯。至於點解會多咗股東，有人就歸咎於「碎股黨」出沒，拆細股票攞着數。
自稱持有小輪「重貨」超過40年嘅小股東鄧先生話，「香港地人人都攞着數，你唔怪得人（碎股黨）」，又指另外啲公司「持一股都可以食，人哋開會前會叫你先填表問嚟唔嚟」，話嗰啲先稱得上有準備，安排好咁話。
另一位小股東文先生就記得，自八九年以5.6元買入小輪，目前持有九手。「往年有九大簋食，有魚有蝦有雞，有甜品，哈哈！」今年佢亦知道公司苦衷，只能「無奈接受」兩張餅卡。
另外，小輪主席林高演接受訪問時就講樓市，話香港樓仲有需求，樓價「暫時有幾個百分點升幅唔出奇」，集團會繼續投地。佢又估計六月美國會加息，香港利率要追番上嚟，呼籲需要貸款嘅人士要留意利息上漲趨勢。
至於母公司恒基地產（00012）主席、人稱「四叔」嘅李兆基有冇考慮退休呢？林高演就話，四叔身體好好，「老人家接近90歲，都託賴」，又話聽唔到四叔有退休安排喎。
余絲韻