絲絲講場：鷹君爭產開庭：羅老太親征撼人海戰術

原告方又點會無羅老太本人作證呢？到底能否一「婦」當關，萬夫莫敵？據講佢老人家今日會先行亮吓相。法庭顧念羅老太98歲高齡，喺作證上有特別安排。

反對羅老太撤換受託人嘅鷹君主席羅嘉瑞（羅家三子），早前經已承認係受託人嘅證人之一，而據知羅家亦有其他成員會為受託人出庭作證。另外，據稱一五年曾被建議提名入鷹君董事局嘅滙豐國際信託前高層Paulina Lau，亦可能會被法庭強制要求作供。

每日最多作供3小時

據悉，羅老太一方就只得羅老太、二子羅旭瑞、孻仔羅啟瑞作證。代表羅老太嘅資深大律師余若海早前就向法庭提議，由於羅老太年事已高，到傳召佢時，每次羅老太只會上午作供兩小時，下午作供一小時。

「只講真話 唔使準備」

審訊第一日，通常由原告方律師陳詞，證人一般未必會咁快需要上庭，不過，絲絲知道，今日羅老太會「御駕親征」到庭為律師團隊打氣，而支持佢嘅二子、孻仔，以及二女羅鴻鏇都會陪伴羅老太到庭聽審。

咁自稱咁大個人第一次告人告到上法庭嘅羅老太究竟有咩準備呢？羅老太就同絲絲講，自己只係識講真話，唔識講假話，所以唔使準備，有充足休息就夠嘞。

余絲韻