絲絲講場：日薪逾200萬庫克一天怎過？
Apple Inc.（蘋果公司）CEO庫克，底薪連花紅加股票獎賞，去年加加埋埋年薪達1.02億美元（約7.96億港元），除開日賺成218萬港元！日賺兩球嘅生活，佢一日究竟係點過嘅呢？
未天光Check八百封電郵
首先係，佢每日凌晨3點45分起身，起身後做嘅第一件事係Check電郵，每日大約700至800封Email咁啦，大部分都親自睇過，所以佢亦自認係工作狂。
5點左右，佢就開始做運動，當然係戴住自家出品Apple Watch啦。不過大家唔會喺Apple個Campus見到佢，事關佢只會喺公司以外地方健身，話保護個人私隱喎。
至於佢嘅早餐，有人見過，係兩個炒蛋白、煎脆嘅煙肉（佢至愛係煙火雞肉）、走糖杏仁奶沖泡無糖麥片。
馬拉松式開會 瞓7粒鐘
到6點半，庫克就正式開工。工作上，佢係個要求甚高嘅老闆，佢做嘢嘅狠勁係人都知，佢會馬拉松式咁開會，質疑一切，仲會隨時隨地發Email畀員工。
不過咁，佢亦係個好有合作精神嘅人，亦好肯聽同事講嘢，佢有時會喺公司餐廳同員工一齊食Lunch。
聽講佢好鍾意戶外運動，工作之餘會去行山或踩單車。
講到瞓覺，庫克就話過自己每晚都要瞓足七個鐘。照咁睇，按佢每日凌晨3點45分起身計，睇怕夜晚九點未夠就要上床瞓嘞。唔知每晚九點鐘嗰時，閣下又做緊咩呢可？
余絲韻