絲絲講場：美團「偷襲」 滴滴程維嬲爆
美團打車正式喺內地7個城市上線打車App，包括北京、上海、成都及杭州等，都啟動咗美團打車用戶報名活動。之不過，美團點評踩入打車領域，隨時搞到兄弟反目。
王興搞打車App冇先講聲
據內媒爆料，原來滴滴出行CEO程維與美團點評CEO王興分屬多年好友，日前兩人仲一齊食飯，當時王興冇提及已準備好踩入七大城市，搶老友生意！結果食完飯，程維睇新聞先知道呢件事。
對於王興偷襲，程維隔空埋怨，好似當年成吉思汗接到佢安答嘅戰書淡然回應：可能有人唔識乜係戰爭，乜係競爭，仲話「爾要戰便戰！」
美團以食評及外賣起家，何解踩過界？美團點評高級副總裁、出行事業部總裁王慧文就話，美團點評日活躍用戶2.5億中30%有出行需求。美團打車事業部已經有超過200人嘅團隊，日訂單量已突破10萬單。
睇埋美團打車嘅宣傳海報，顯示用戶可領取3張當地出租車起步價等值無門檻優惠券，司機註冊成為車主仲可以獲得美團打車「零抽成」特權。擺明玩燒錢搶客！
其實美團點評十月完成新一輪40億美元融資，冇幾耐就升級組織架構，成立出行事業部。睇嚟美團早有預謀踩入出行領域，仲彈藥十足。
余絲韻