Market Insight：食品股有勢追落後

連走勢較落後的統一企業（00220）、蒙牛乳業（02319）及中國旺旺（00151）都有4.2至5.5%的升幅。

旺旺不妨跟炒一轉

內地食品及飲料市場競爭大，早年的即食麵價格戰引來一場哄動，結果大家都傷。依家改變策略，以中價產品做主打提升毛利。即食麵愈來愈多花款，加上現時有唔少外賣手機應用程序，足不出戶一樣有豐富大餐，公仔麵自然被比下去。

長遠而言，競爭大是必然，龍頭企業市佔率大，議價能力較高，相對有優勢，跟住就睇下有咩法寶應對網絡世界。

既然短期有資金進場，不妨跟炒一轉，博繼續追落後可睇吓旺旺，昨日一彈重上各平均線，守住50日線6.2元樓上，有望升多浸。

朝日出售青啤股權一事終扑錘，竟然唔係之前傳聞的同行潤啤出手，而係復星國際（00656）。復星收市後公布，以約66億元向朝日收購青啤2.43億股，即已發行H股的37.11%，每股作價27.22元，較昨收市價折讓近32%。

兩大傳統藍籌值博

港股昨日成交進一步縮減至8字頭，得802億元，波幅收窄至167點。港股唔上唔落，收報29,234點，跌19點。

古勝周初提過，如果融創中國（01918）股價跌穿今轉批股價31.1元，短期內難有運行，事隔幾日，已經隊到低見27.3元，可能低處未算低，咪手多多撈底。

內房板塊之前係咁爆上，愈升愈有，現時氣氛經已明顯逆轉，大部分股份由高位回吐唔少。今年銷售逾5,000億元人仔，遙遙領先同行的碧桂園（02007），股價表現較硬淨，橫行唔跌都算係咁。

想穩穩陣陣，不如留意吓大笨象滙豐控股（00005）同港交所（00388），聯儲局預計下年再加息三次，資金有機會回流傳統金融股；至於港交所，市場對明年上半年股市表現仍樂觀，大市轉強將利好其股價。

大型藥企始終較佔優

醫藥股最近表現唔錯，有幾隻股份先行衝高。金斯瑞生物科技（01548）呢個多禮拜以來抽升一兩日，停一停又再升，由10元水平起步，一度升穿17元。綠葉製藥（02186） 昨日公布子公司煙台綠葉今年首九個月業績，收入按年增13.7%至24.7億元人仔，純利增17.5%至6.8億元人仔，刺激股價抽升近一成，以全日高位5.88元報收，創52周新高。

國藥似見底回升

四環醫藥（00460）及白雲山（00874）昨日有約2%的升幅，國藥控股（01099）升1.2%，論短期走勢，國藥值得望多兩眼。該股十一月初開始一直向下走，上周在30元築底，周二裂口高開，連續兩日反彈，值得留意是否扭轉跌勢。

如果從業務性質睇，國藥主要做分銷同零售，古勝會較睇好業務包含藥品研發的企業，好似復星醫藥（02196）同石藥集團（01093），又或者中藥方面的中國生物製藥（01177） 及白雲山等。

內地整體對醫藥的需求及品質要求提高，中央已講明未來會重視研發，逐步改變以往依賴進口的情況，大型藥企在競爭中佔優，前景較樂觀。

古勝