絲絲講場：巨企1秒賺幾錢 包你唔信！

若果以月薪一萬蚊計算，每秒收入其實只有0.38港仙；換句話講，要月薪去到三萬港元，每秒收入才達一毫子左右。呢個數仲要計埋休息時間在內，但仍然未計生活開支！你有冇諗過，在扣除開支與關舖時間，全球最賺錢嘅企業每秒盈利可以有幾多？

Apple每秒袋萬一稱冠

外國傳媒就計到條數，當你連睡眠時間在內嘅收入亦僅幾仙或一毫子時，舊年全球最賺錢企業蘋果公司（Apple Inc.）每秒（計及實體店休息時間）係賺1,444.76美元（約11,269港元），即每小時賺520萬美元、每日賺超過1.2億美元、每年賺近457億美元。名副其實「打個乞嚏」都搵多過大家嘅月薪！

換句話講，Apple每秒盈利差唔多等同唔少香港打工仔月薪。雖今年未過完，如果Apple第四季業績冇太大意外，相信今年平均每秒盈利更增至1,533.17美元（約11,958港元），睇嚟香港唔少果粉包括閣下都有份「進貢」。

更甚嘅係，Apple秒賺數字大幅拋離排第二嘅摩通及第三嘅股神巴菲特投資旗艦巴郡，可謂威盡全球。

余絲韻