Market Insight：電力股有機炒落後

煤價回落 改善營運

講開又講，中資電力股又有番啲起色，除潤電外、華能國際（00902）升3.8% 、大唐發電（00991）及華電國際（01071）分別升1.9%及2.5%。電力股異動，主要受季度數據帶動，華能上季純利同比跌38%，但按季改善，首九個月核心盈利亦勝預期。

咁到底追唔追得過，就仲要睇埋煤價表現。早前大和就發表報告，預期受去年高比較基數，以及華北地區的煤轉氣政策所影響，十一月開始至年底，煤價按年會下跌。若年底前煤價真的回落，照計電力股炒落後仲有得玩吓。

論走勢，潤電以一支大陽燭向上，若呢浪能乘勢突破15元大關，有望突破由次季延伸的降軌阻力，回吐支持在14元。至於華能，股價已一連重上10日、20日及50日線，惟5.2至5.3元水平阻力不輕，若未有持貨，可候突破再追入。

大昌集團升得有道理

港股市況繼續反覆，冇咩微言大義，都係等待本周美國經濟數據同下周初港股期指結算。呢期古勝睇住52周升幅榜，好似一路都見到隻大昌集團（00088）榜上有名。

豪宅價值水漲船高

睇番佢幅走勢圖，原來該股自九月下旬在8元邊起步，至本月中旬突破8.6元阻力位，日日升啲，昨日再創52周新高8.95元，收報8.92元，升0.22%。現價計往績市盈率28倍，息率3.6厘，較每股資產淨值（NAV）11.24元折讓兩成。

老實講，折讓經已唔算太大，但仍能炒上，主要係公司近年積極拓展豪宅業務，旗下淺水灣道豪宅項目料於年底前完工，市場憧憬項目落成後銷售，將可帶動業績表現。依家公屋都賣到天價，中上環商用項目價格更加驚人，大昌呢個淺水灣項目喺一二年投得，照計利錢都幾可觀，難怪股價可以慢火煎魚。

車股未宜急於追入

內媒指中央計劃在一八年削減新能源汽車補貼20%，惟昨日部分汽車股突然踩油，華晨中國（01114）升3.5%，吉利汽車（00175）同北京汽車（01958）均升2.3%，比亞迪（01211）就升1.3%，似乎有啲勢。

不過，睇番近期整個板塊表現，年內人氣之選的吉汽及比亞迪近月走勢就唔多醒神，尤其後者從十月九日高見83.7元後就拾級而落，莫講話試衝紅底，純睇走勢反而有營造圓頂下跌迹象，加上10日線已跌穿20日線呈死亡交叉，短期能企穩已屬萬幸。

此外，摩根大通就表示，市傳中央或考慮再削減明年新能源汽車補貼20%及Tesla有機會於上海開設廠房，上述兩個消息對比亞迪均構成負面影響。不過，該行認為可藉其調整後進行收集，對比亞迪維持「增持」評級，目標價100元。策略上，姑勿論比亞迪是否已見底，但股價近期轉弱卻是鐵一般事實，故建議暫時靠邊站，候其股價跌勢喘定後，才決定是否再收集。

至於吉汽，近期的走勢亦見減弱，惟股價就相對硬淨，現價仍守穩20日線及中期升軌支持，但見MACD熊叉持續，14日RSI回至56，加上年內累積升幅已多，故建議等其收市重上10日線再作部署。

古勝